НҮБ-ийн Ерөнхий Ассамблэйгээс жил бүрийн 12-р сарын 3-ны өдрийг Хөгжлийн бэрхшээлтэй иргэдийн эрхийг хамгаалах Олон улсын өдөр болгон “Хөгжлийн бэрхшээлтэй хүмүүсийн оролцоо, тэгш байдлыг хангаж, эрх мэдэлжүүлэх” уриан дор тэмдэглэн өнгөрүүлдэг.

Тэгвэл энэ өдрийг угтан Сонгинохайрхан дүүргийн Засаг даргын Тамгын газраас санаачлан “Хүртээмжтэй орчин, загвар дүүрэг” аяныг хэрэгжүүлэх гэж байна. Уг ажлын эхлэл болгож, “Хөгжлийн бэрхшээлтэй иргэдийн хөгжил, ажлын байрыг нэмэгдүүлэх арга зам” хэлэлцүүлгийн зохион байгууллаа.

Хэлэлцүүлэгт дүүргийн Засаг даргын Тамгын газрын хэлтэс алба болон Засаг даргын эрхлэх асуудлын хүрээний хэлтэс албад мөн дүүргийн нутаг дэвсгэрт үйл ажиллагаа явуулдаг аж ахуйн нэгж байгууллага, хөгжлийн бэрхшээлтэй иргэд, хөгжлийн бэрхшээлтэй иргэдийн эцэг, эхийн  төлөөлөл оролцсон юм.

Аяны хүрээнд төрийн болон хувийн хэвшлийн байгууллагуудын гадаад дотоод орчинд хөгжлийн бэрхшээлтэй иргэдэд ээлтэй орчин бүрдүүлэх түүнчлэн хамгийн гол нь хөгжлийн бэрхшээлтэй иргэдийг хөгжүүлэх жишиг байртай болох зэрэг санал санаачлагууд гарсан юм.

Жишиг байрны тухайд Нийгмийн даатгалын хэлтсийн дэргэд байрлах бөгөөд уг байрыг засварлахад 35 сая төгрөг шаардлагатай байгаа аж. Харин хэлэлцүүлгийн үеэр аж ахуйн нэгж байгууллагын төлөөллүүд бэлэн болон бус хандив өгч, уг байрыг нэн даруй ашиглалтад оруулахыг дэмжлээ.

 

 

 

Монгол улс Хүүхдийн сүрьеэгийн өвчлөл өндөр орны тоонд ордог. Жил бүр дунджаар 4,108 сүрьеэгийн шинэ тохиолдол бүртгэгдэж байгаагаас 388 буюу 9% гаруй нь хүүхдийн сүрьеэ байна.

Чингэлтэй, Сонгинохайрхан дүүргийн хэмжээнд ерөнхий боловсролын төрийн өмчийн 34 сургууль байгаагаас  17  буюу  50%-д сүрьеэгийн тохиолдол бүртгэгджээ.

Сүрьеэгийн өвчлөл бүртгэгдсэн сургуулийн багш, сурагчдад сүрьеэ өвчний талаар мэдлэг хандлага олгох өртөөчилсөн сургалт зохион байгуулах, урьдчилан сэргийлэх зөв үйлдэл, дадалд  сургах, сургагчдыг бусдад зааж сургах мэдлэг дадалтай болгох зорилгоор нийт 2000 сурагчийг хамруулсан сургалтыг 2018 оны 11 дүгээр сарын 12-ноос 20-ны өдрүүдэд тусгай хуваарийн дагуу явуулж байна.

“Гэр хорооллыг хөгжүүлэх, хөрөнгө оруулалтыг дэмжих хөтөлбөр”-ийн хүрээнд Баянхошуу дэд төвийг түшиглэн барьсан 240 хүүхдийн ортой цэцэрлэг ашиглалтад орлоо.

Сонгинохайрхан дүүргийн 8 дугаар хорооны нутаг дэвсгэрт баригдсан уг цэцэрлэг дулаан алдалтгүй технологиор баригдсанаараа онцлог юм.

Цэцэрлэг 10 бүлэг хичээллэх анги, гал тогооны өрөө, угаалгын өрөө, багш ажилчдын өрөө зэрэг танхимуудтай бөгөөд 1 хүүхдэд стандартын дагуу 6.78 м/кв талбай ногдохоор тооцож барьж байгуулжээ.

Сонгинохайрхан дүүргийн 26-р хороо 20 гаруй мянган иргэн, цэцэрлэгийн насны 3800 орчим хүүхэдтэй. Гэсэн хэдий ч энэ жилийг хүртэл төрийн өмчийн сургууль цэцэрлэггүй байсан.

Харин 2018 оны эхэнд 240 хүүхдийн ортой 253-р цэцэрлэгийг шинээр ашиглалтад оруулж, хорооны нөхцөл байдлаас шалтгаалан 400 орчим хүүхдийг хамруулаад байна.

Тэгвэл өнөөдөр тус хороонд мөн улсын төсвөөр 150 хүүхдийн ортой цэцэрлэгийн шав тавилаа. Уг цэцэрлэгийн барилгын гүйцэтгэгчээр “Энэрэлт их эрдэнэ” ХХК ажиллаж байгаа бөгөөд 2019 оны 8-р сарын 1-нд ашиглалтад хүлээлгэж өгөх юм.   

Нийслэлийн иргэдийн спортын VII их наадмын шигшээ тэмцээн 2018 оны 11-р сарын 05-06-ны өдрүүдэд Буянт-Ухаа спорт ордонд зохион байгуулагдлаа. Тус наадамд спортын 8 төрлөөр 9 дүүргийн шигшээ тамирчид өрсөлдөж дүнгээ гаргалаа.

Уг наадмын спорт явган аяллын төрөлд Б.Соёл-Эрдэнэ Засаг даргатай 3-р хороо хүрэл медаль, сагсан бөмбөгийн төрөлд Д.Отгонбурам Засаг даргатай 19-р хорооны эрэгтэй баг мөнгөн медаль, олс таталтын төрөлд С.Очир Засаг даргатай 6-р хорооны эрэгтэй баг мөнгөн медаль, 31-55 насны ангилалын хийн дасгалын төрөлд Г.Бадамцэцэг Засаг даргатай 31-р хорооны баг тамирчид хүрэл медаль, аэробик төрөлд мөнгөн медаль тус тус хүртлээ.

Сонгинохайрхан дүүрэг 120 мянган гаруй га талбай нутаг дэвсгэртэй. Үүний 20 мянган га талбайг ой, тал хээрийн бүс эзэлдэг. Засаг захиргааны 32 хорооны хувьд 22 нь гэр хороолол, 10 нь орон сууцны хороолол байна.

Гэр хороолол ихтэйн хэрээр ахуйн шинжтэй гал түймэр их гардаг. Дүүргийн нутаг дэвсгэрийн хэмжээнд 2017 оны эхний 10 сарын байдлаар 487 удаа, 2018 оны эхний 10 сарын байдлаар 458 удаагийн объектын гал түймрийн дуудлага ирсэн нь өнгөрөгч оны мөн үеийнхэнтэй харьцуулахад 23 тохиолдлоор буюу 4.8 хувиар буурсан байна.

Энэ оны эхний 10 сарын байдлаар мэргэжлийн байгууллагад ирсэн гал түймрийн дуудлага дотор тоогоороо жин дарж буй шалтгаан нөхцөлүүдийг дурдвал өвлийн сууц 139, монгол гэр 61, ил задгай хаясан хог 59, барилга байгууламж 22, эд зүйл агуулах болон гэрийн үүдний пин 42, цахилгааны самбар, шит, утас зэргээс үүдсэн галын дуудлага 28 удаа ирсэн байна.

Түүнчлэн Сонгинохайрхан дүүрэгт улсын онц аюултай объект 153, гал түймрийн 1-р зэргийн аюултай барилга 55, гал түймрийн 2-р зэргийн аюултай барилга 136 байдаг.

Тиймээс иргэд та бүхэн гал түймрийн аюулаас урьдчилан сэргийлнэ үү. 

Монгол Улсын Засгийн газрын 2017 оны 11-р тогтоолоор батлагдсан “Халдварт өвчнөөс сэргийлэх, хянах үндэсний хөтөлбөр”, Эрүүл мэндийн сайдын 2014 оны 385 дугаар тушаалын дагуу улсын хэмжээнд “дархлаажуулалтын 10 хоног”-ийг жилд 2 удаа зохион байгуулдаг.

Энэ жилийн тухайд улсын хэмжээнд ДЭМБ-ын гэрчилгээтэй БНСУ-ын “Грийн кросс” үйлдвэрийн 125 мянган хүн тун вакциныг хүлээн авч, сайн дурын дархлаажуулалтыг эхлүүллээ.

Уг вакцинаар эмч, эмнэлгийн ажилчид, нийслэлийн 160 гаруй цэцэрлэгийн  хүүхэд, замын цагдаа, онцгой байдлын албан хаагчид зэрэг зорилтот бүлгийн хүн амыг үнэ төлбөргүй дархлаажуулах юм.

Сонгинохайрхан дүүргийн тухайд эрүүл мэндийн байгууллагын 920 ажилтан, 33 цэцэрлэгийн 15.338 хүүхэд, 65 болон түүнээс дээш насны иргэд, архаг хууч өвчтэй хүмүүс болон жирэмсэн эмэгтэйчүүд буюу эрсдэлт бүлгийн 1088 иргэн нийлсэн нийт 17.346 иргэн уг дархлаажуулалтад хамрагдах юм. 

Сонгинохайрхан дүүргийн Жижиг, дунд үйлдвэрлэлийг дэмжих мэдээлэл, сургалтын төвд бүртгэлтэй 1000 гаруй аж ахуйн нэгж байгууллага, хувь хүмүүс одоогоор байдлаар баялаг бүтээж, бараа бүтээгдэхүүн үйлдвэрлэж байна.

Тэдний бараа бүтээгдэхүүнийг зах зээлд нийлүүлэх, борлуулалтын нэгдсэн цэг байгуулах тухай Засаг даргын үйл ажиллагааны хөтөлбөрт тусгагдсан байдаг. Үүний дагуу өнөөдөр “Эрин” хорооллын “Mongolian outlet” дэлгүүрийн 2 давхарт “Сонгинохайрхан outlet” дэлгүүрийг нээлээ.

Дэлгүүр 150м2 талбайтай бөгөөд одоогийн байдлаар уг дэлгүүрт 100 гаруй үйлдвэр эрхлэгчдийн бараа бүтээгдэхүүн тавигдсан байна. Цаашид дэлгүүрээ агуулахтай болгож, илүү олон үйлдвэрлэгчдийн бараа бүтээгдэхүүнийг байршуулж, иргэдэд холбох гүүр нь болж ажиллахаар төлөвлөж буйгаа Жижиг, дунд үйлдвэрлэлийг дэмжих мэдээлэл, сургалтын төвийн хамт олон хэлж байсан юм.

Тус дэлгүүрт одоогоор зөвхөн бэлэн бараа бүтээгдэхүүн зарагдаж байгаа бөгөөд бөөнөөр болон үйлдвэрийн үнээр худалдаалагдаж буйгаараа бусад дэлгүүрээс онцлогтой аж. 

Сонгинохайрхан дүүргийн дийлэнх хэсгийг гэр хорооллын айл өрхүүд эзэлдэг. Энэ ч утгаараа хотгор гүдгэр ихтэй, шавар шавхай тогтдог шороон замтай гудамж ихтэй. Иргэдийн зүгээс зорчиход хүндрэлтэй эдгээр шороон замуудыг засварлаж өгөх хүсэлт их ирдэг.

Тиймээс дүүргийн Засаг даргын 08 дугаар сарын 30-ны өдрийн А/411 дүгээр захирамжаар хот тохижуулах зардлаас 49.9 сая төгрөг шийдвэрлэн, шороон замын засварын ажил хийлээ.

Тодруулбал машинаар болон явган зорчиход хүндрэлтэй байсан гэр хорооллын 21 хорооны гудамжны 38.843 метр замыг 442 машин шороо асгаж, тэгшлэн, 6 байршилд 51 метр үерийн ус зайлуулах хоолойг суурилуулсан байна.