СОНГИНОХАЙРХАН ДҮҮРЭГ

ЗАСАГ ДАРГЫН ТАМГЫН ГАЗАР

Иргэдийн эрүүл аюулгүй орчинд амьдрах эрхийг хангах, хог хаяхгүй байх дадал төлөвшүүлэх, дүүргийн нутаг дэвсгэрийн үүсмэл болон хур хог хаягдлын цэгийг бүрэн устгах, дахин хог хаягдлын цэг үүсгэхгүй байх үйл ажиллагааг идэвхжүүлэх, хог хаягдлыг бууруулах талаар шинэ арга барил бүхий санал, санаачлагыг дэмжих зорилгоор ”Хоггүй орчин-Эрүүл амьдрал” аяныг зохион байгуулан ажиллалаа. 

Тус аяны хүрээнд дүүргийн хэмжээнд 166 хур болон үүсмэл хогийн цэгийн судалгааг гаргаж хог хаягдлыг тээвэрлэгч байгууллагууд болон 32 хороо, аж ахуйн нэгж байгууллагууд төлөвлөгөө гарган ажиллаж, бүх хур хогийн цэгийг бүрэн устгаж цэвэрлэсэн. Байгаль орчны яамнаас улсын хэмжээнд зарласан “Цэвэр сайхан орчин” болзолт уралдаанд улсын хэмжээнд 3 дугаар байр, нийслэлийн 9 дүүргээс 1 дүгээр байр эзлэн амжилттай оролцлоо.

Хоггүй орчин-Эрүүл амьдрал аяны хүрээнд давхардсан тоогоор  11,396 аж ахуйн нэгж байгууллага тогтмол цэвэрлэгээ хийж 25,924 иргэн цэвэрлэгээнд хамрагдаж, 60,000 гаруй м2 талбайг цэвэрлэж, нийт 15,878 рейсээр 90 гаруй мянган тонн хог хаягдлыг тээвэрлэн цэвэрлэсэн байна.  

Засаг даргын Тамгын газар, Тохижилт нийтийн аж ахуйн хэлтсээс дүүргийн тохижилтийн ажлыг хийж гүйцэтгэж байна. Дүүргийн өнгө үзэмжийг нэмэгдүүлэх ажилд аж ахуйн нэгжүүд идэвхтэй хамрагдахаас гадна иргэд хувь нэмрээ оруулж байгаа юм.

Монгол Улсын Засгийн газрын хэрэгжүүлэгч агентлаг Гэр бүл, Хүүхэд, Залуучуудын хөгжлийн газрын 2017 оны 08 сарын 28-ны өдрийн 01/485 тоот үүрэг даалгаврын хэрэгжилтийн хүрээнд хүүхэд харах үйлчилгээ эрхэлдэг багш нарыг чадавхжуулах зорилгоор дүүргийн Гэр бүл, хүүхэд, залуучуудийн хөгжлийн төв, Мэргэжлийн хяналтын хэлтэс болон Онцгой байдлын хэлтэстэй хамтран 09 сарын 09-ний өдөр тус дүүрэгт хүүхэд харах үйлчилгээ эрхэлж буй 79 хүүхэд харагч багш нарт онол, дадлага хосолсон сургалтыг амжилттай зохион байгууллаа.

Сонгинохайрхан дүүргийн Жижиг дунд үйлдвэрлэлийг дэмжих төвөөс дүүргийн иргэн залуучууддаа нэгэн боломжийг олгож байна. Тодруулбал ЕБС-ийн 9-р анги төгссөн болон сургуулиас завсардсан мөн хөгжлийн бэрхшээлтэй 25 хүртлэх насны Сонгинохайрхан дүүргийн иргэн залуучуудыг "Амьдрах ухаан" академийн дэргэдэх Мэргэжил сургалт үйлдвэрлэлийн төвд тогооч, нарийн бичгийн дарга албан хэргийн ажилтан, оёмол бүтээгдэхүүний оёдолчин гэх мэт мэргэжлээр үнэ төлбөргүй суралцах боломжийг олгож байгаа аж.

14-р хорооны Засаг дарга Х.Эрдэнэтуяагийн урилгаар Пүкүока Их сургуулийн шигшээ багийн тамирчин Такахиро Такэбэ болон Монголын залуу бэйсболлчдын холбооны ерөнхийлөгч А.Ариунболд нар дүүргийн Засаг даргын Төсөл хөтөлбөр, Хөрөнгө оруулалт, Хамтын ажиллагаа хариуцсан орлогч дарга Л.Оргилтой уулзлаа.

Уулзалтаар Сонгинохайрхан дүүрэгт бэйсболлын баг байгуулах цаашид энэ спортын хөгжлийн төлөө дүүргийн удирдлагуудтай хамтарч дүүргийн баг тамирчдын чадварыг сайжруулах чиглэлээр ажиллахаар боллоо.  

Сонгинохайрхан дүүргийн 21-р хороо буюу “Жаргалант” тосгонд өнгөрөгч 7 сарын 25-ны өдөр хүчтэй аадар борооны улмаас үер бууж нэг том хүн хоёр бага насны хүүхэд амь эрсдсэн.

Үерт амиа алдсан эмэгтэйн хүү Гантулгад НАМЗХ-ны залуус тусламж үзүүлж хичээлийн шинэ жилийг угтан иж бүрэн хичээлийн хэрэгсэл, сурагчийн дүрэмт хувцас болон өвлийн хувцас зэргийг бэлэглэлээ.

Монгол Улсын Үндсэн хуульд нэмэлт, өөрчлөлт оруулах төслийн хэлэлцүүлгийг 9-р хороо амжилттай зохион байгууллаа. Хэлэлцүүлгийг тус хорооны Засаг дарга Л.Бямбадорж удирдан явуулсан бөгөөд иргэдийн сонирхсон асуултад хариулт өгч, саналыг нь авсан байна.

Сонгинохайрхан дүүргийн 22-р хороо буюу Тахилтад шинэ ус түгээх байр ашиглалтад орлоо. Ингэснээр иргэд ундны цэвэр усаа ойроос авах, мөн эрүүл баталгаатай ус хэрэглэх нөхцөл боломжоор хангагдаж байна.

2017.08.22-нд Монгол Улсын Үндсэн хуульд нэмэлт, өөрчлөлт оруулах төслийн хэлэлцүүлгийг 3-р хороо амжилттай зохион байгуулжээ. Хэлэлцүүлгийг тус хорооны Засаг дарга Б.Соёл-Эрдэнэ удирдан явуулсан бөгөөд иргэдийн сонирхсон асуултад хариулт өгч, саналыг нь авсан байна.

 

     Үндсэн хуульд нэмэлт өөрчлөлт оруулах төслийн танилцуулгыг улс орон даяар явуулж байгаа билээ. Үүний хүрээнд дүүргийн 32 хорооны иргэдтэй уулзалт хийж байгаа юм. Өнөөдөр дүүргийн 5 дугаар хорооны иргэдтэй ЗДТГ-ын Хууль зүйн тасгийн дарга Б.Мөнгөншагай уулзаж Үндсэн хуульд нэмэлт өөрчлөлт оруулах төслийн танилцуулга хийлээ.