Видео

2013 оны жилийн эцсийн санхүүгийн тайланг  2014 оны 1 дүгээр сарын 2-оос 2 дугаар сарын 10-ны дотор хүлээн авах болно.

Энэ хугацаанд байгууллагын санхүүгийн ажилтан нь онлайн программд тайлангаа тодруулгын хамт шивж илгээсэн байх шаардлагатай бөгөөд цаасаар заавал баталгаажуулна. Тайланг тушаахдаа шуудангаар илгээж болно.

ШУУДАНГИЙН ХАЯГ: УЛААНБААТАР ХОТ СОНГИНОХАЙРХАН ДҮҮРЭГ   ЗАСАГ  ДАРГЫН ТАМГЫН ГАЗАР

ТАЙЛАН ШИВЭХ ЦАХИМ ХАЯГ: httj://202.170.66.203//

Бүх нийтийн их цэвэрлэгээ

 

Нийслэлийн Засаг даргын Тамгын газраас шинэ оныхоо ажлыг дүүргүүдийн өнгөрөгч 2013 оны ажлыг дүгнэн шалгахаас эхлээд байна. Засгийн газрын тогтоолоор “Захиргааны байгууллагын хяналт-шинжилгээ, үнэлгээний журам” шинэчлэгдэн батлагдсантай холбогдуулан хийж байгаа  энэхүү шалгалт нь дүүргийн Засаг дарга, түүний Тамгын газрын 2013 оны үйл ажиллагаа зорилго, зорилтын биелэлт, өнөөдрийн  байдлыг дүгнэж үнэлэх зорилготой юм.
Шалгалт 1 дүгээр сарын 6-наас эхлэн явагдсан бөгөөд өнөөдөр буюу 1 дүгээр сарын 16-ны өдөр Сонгинохайрхан дүүргийг шалгаж байна.
НЗДТГ-ын Төрийн захиргаа, удирдлагын газрын дарга Ү.Ганболдоор ахлуулсан ажлын хэсэг Сонгинохайрхан дүүргийн ажлыг таван үндсэн чиглэлийн 35 шалгуур үзүүлэлтээр дүгнэнэ.

 

Сар шинийн баяр болох гэж байгаатай холбогдуулан иргэдийн төвлөрлийг сааруулах, замын хөдөлгөөний ачааллыг бууруулах зорилгоор нийслэлийн Засаг дарга Сар шинийг угтан авах зарим арга хэмжээний тухай А/09 дугаар захирамж гаргасан. Захирамжийн дагуу томоохон зах худалдааны төвүүдийн замын хөдөлгөөний чиглэлд өөрчлөлт оруулах, уулзваруудын нэвтрүүлэх чадварыг нэмэгдүүлэх, сар шинийн өмнөх амралтын өдрүүдэд автомашины улсын дугаарын тэгш, сондгойгоор нь ялган замын хөдөлгөөнд оролцуулах, энэ хугацаанд гэр хорооллоос “Нарантуул” худалдааны төв рүү нийтийн тээврийн буухиа автобус явуулах зэрэг түр зохицуулалт хийхээр болсон.

 

Түүнчлэн сар шинийн баярын өдрүүдээр гэр хороололд үүсдэг замын хөдөлгөөний түгжрэлийг бууруулахад онцгой анхаарал хандуулан ажиллах, нийтийн эзэмшлийн гудамж, замын гэрэлтүүлгийг сайжруулах, гэр хорооллын гудамж, замын гэрэлтүүлгийг асаах,  гэрэлтүүлэггүй гудамжид шинээр гэрэлтүүлэг тавих зэрэг ажлыг хэрэгжүүлэх юм. Энэ хүрээнд Улаанбаатар хотын Захирагчийн ажлын алба, нийтийн үйлчилгээний “Улаанбаатар нэгтгэл” ОНӨААТҮГ-аас гэр хорооллын гудамж, замуудын гэрэлтүүлгийг нэг бүрчлэн шалгаж, шинээр гэрэлтүүлэг тавих шаардлагатай газруудыг судалжээ. Судалгаагаар Баянзүрх дүүргийн Маахуур толгойн 1,2-р гудамж, Улиастайн хуучин эцэст, Хан-Уул дүүргийн  6-р хороо Алтат нүхт гудамж, Сонгинохайрхан дүүргийн Хилчин хотхон, Монлаагийн гудамж, Баянхошууны 10-р хороо Жанцангийн уулзвараас зүүн тийш 5 гудамж, мөн 8-р хорооны гудамжуудад гэрэлтүүлэг шаардлагатай нь тогтоогджээ. Тиймээс эдгээр газруудад нийт 144 гэрэлтүүлэг шинээр хийхээр боллоо гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Сар шинийн баярын өдрүүдээр гэр хорооллын гудамж замуудад хөдөлгөөний ачаалал эрс нэмэгдэж түгжрэл үүсдэг. Тиймээс Улаанбаатар хотын замын хөдөлгөөний ачааллыг бууруулах ажлын хэсгээс гэр хорооллын гудамж замуудад шинээр гарц гаргаж, боломжтой замуудыг өргөсгөж, тэгшлэх, хөдөлгөөний аюулгүй байдлыг хангах, халтиргаа гулгааг арилгах ажлуудыг хийхээр шийдвэрлэлээ. Замын цагдаагийн газрын өгсөн мэдээллээр Үйлдвэрчний эвлэлийн гудамж, Хувьсгалчдын гудамж, Баянхошуу, Хайлааст, Долоон Буудал, Гандангийн гудамж, замуудад түгжрэл ихээхэн үүсдэг байна.

 

Эдгээр газруудад тээврийн хэрэгсэлд зориулсан замын зорчих хэсэг нь эвдэрсэнээс автомашинуудын хөдөлгөөн удааширч замын хажуу талаар явах, урсгал сөрөх нөхцөл бий болдог. Тиймээс эвдрэл ихтэй замыг шар шороогоор дүүргэх, эсвэл хүйтний улиралд хийх боломжтой асьфалтан нөхөөс тавих, зарим замуудын голоор тусгаарлах хаалт хийж шаардлагатай гэж үзжээ. Өнөөдрийн байдлаар Зурагтын эцсээс Дэнжийн мянгын асфальт бетон замыг холбосон 500 метр шороон замыг шинээр тавьж байгаа бөгөөд Баянхошууны Хөтлийн зам, 3, 4 дүгээр хорооллын эвдэрсэн замуудыг шороогоор дүүргэж тэгшлээд байна. Цаашлаад 1-р хорооллын 34-р байрнаас Хангай захын уулзвар руу ордог замын нарийссан хэсгийг өргөсгөж, Хангай захын баруун урд талын гэрлэн дохионы зохицуулалтыг өөрчлөн, Гандангийн гудамжаас Гэсэр сүмийн уулзвар руу орох замын халтиргааг арилгаж, тэгшлэх  юм гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Засаг дарга бөгөөд Улаанбаатар хотын Захирагч Э.Бат-Үүл Сар шинийн баярыг угтаж авах зарим арга хэмжээний тухай А/09 дүгээр захирамж гаргасны  дагуу цагаан сарын баярын өмнөх 2 долоо хоногийн амралтын өдрүүдэд  автомашины улсын дугаарыг тэгш, сондгойгоор нь ялган замын хөдөлгөөнд оролцуулахаар болсон. Дээрх түр зохицуулалттай холбоотойгоор Нийслэлийн тээврийн газраас амралтын өдрүүдэд  “Нарантуул” худалдааны төв рүү Орбит, Нарангийн гол, Баянхошуу, ХМК, Чингэлтэй, Дэнжийн 1000, Бэлх, Шархад, Улаанхуаран, Яармаг, Нисэх гэсэн 11 чиглэлээс 10-17 цагийн хооронд том оврын автобусыг үйлчилгээнд гаргах юм. Буухиа автобус нь Нарантуул худалдааны төв рүү 10:00, 11:00,12:00,14:00,16:00 цагуудад явах бол 11:00, 12:00, 13:00, 15:00, 17:00 цагаас “Нарантуул” худалдааны төвөөс буцах юм. Эдгээр автобусаар ахмад настан, хөгжлийн бэрхшээлтэй иргэд үнэ төлбөргүй зорчихоос гадна том хүн 400 төгрөг, хүүхэд 200 төгрөгөөр зорчино гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

 

Сар шинийн баяр болохтой холбогдуулан орон нутгаас нийслэлд ирэх тээврийн хэрэгслийн тоо ердийнхөөс 3-4 дахин нэмэгдэж, нийслэлийн төвийн бүсэд түгжрэл үүсдэг. Тиймээс замын хөдөлгөөний ачааллыг бууруулах, төвлөрлийг сааруулах зорилгоор нийслэлийн Засаг дарга Сар шинийн баярыг угтсан зарим арга хэмжээний тухай А/09 дүгээр захирамж гаргасан юм. Захирамжийн дагуу сар шинийн өмнөх амралтын өдрүүдээр буюу 2014 оны 1 дүгээр сарын 18,  25-ны бямба гарагт  сондгой, 1 сарын 19, 26-ны ням гарагт тэгш тоогоор төгссөн тээврийн хэрэгсэл НИТХ-аас тогтоосон бүсэд 10:00-20:00 цагийн хооронд замын хөдөлгөөнд оролцохгүй. Харин энэ өдрүүдэд  "Нарантуул" худалдааны төв рүү гэр хорооллын 11 чиглэлээс 22 буухиа автобус иргэдэд үйлчилнэ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

 

 Дүүргийн эдийн засаг, нийгмийн 2014 оны зорилтыг хэрэгжүүлэх тухай албан даалгавар, календарьчилсан төлөвлөгөөний загварыг татан авч хэрэгжүүлнэ үү

Та Календарьчилсан төлөвлөөгөөний загварыг энд дарж үзнэ үү.

 

“Улаанбаатар хотыг 2030 он хүртэл хөгжүүлэх хөгжлийн хөтөлбөр”, Нийслэлийн Засаг даргын 2013-2016 оны мөрийн хөтөлбөрт тусгагдсаны дагуу Гэр хорооллын дахин төлөвлөлтийн төслийг өнгөрсөн оноос нийслэлийн гэр хорооллын 20 байршилд хэрэгжүүлж  эхэлсэн.  Нийслэлийн ИТХ-ын 2013 оны 7/29, 12/43 тогтоол, Гэр хорооллын дахин төлөвлөлтийн үйл ажиллагааны журам”-ын дагуу тухайн төслийг хэрэгжүүлэхээр санал ирүүлсэн аж ахуйн нэгжүүдийг төслийн удирдах хороо шалгаруулж, эцсийн байдлаар төсөлд хамрагдах нутаг дэвсгэрт оршин сууж буй  иргэдийн санал хураалтаар шийдвэрлэж байгаа юм. Дээрх журмын дагуу иргэдээс олонхийн санал авч Гэр хорооллын дахин төлөвлөлтийн төсөл хэрэгжүүлэх  эрхтэй болсон дөрвөн аж ахуйн нэгжид нийслэлийн Засаг дарга төсөл хэрэгжүүлэх “Батламж” гардууллаа. 

 

Энэ үеэр нийслэлийн Засаг дарга бөгөөд Улаанбаатар хотын Захирагч Э.Бат-Үүл “Гэр хорооллын дахин төлөвлөлтийн төслийг хэрэгжүүлэхээр зориг гаргасан та бүхэнд нийслэлчүүдийнхээ нэрийн өмнөөс талархал илэрхийлье. Хэдийгээр уг төслийг хэрэгжүүлэхэд олон бэрхшээл тулгарах ч нийслэлийн удирдлагууд та бүхэнд эрх үүргийнхээ дагуу тусалж, хамтын хүчээр энэ түүхэн бүтээн байгуулалтыг хойч үедээ хүлээлгэн өгөх болно гэдэгт итгэж байна“ гэдгийг онцлон хэлсэн юм.
Батламж гардан авснаар Сонгинохайрхан дүүргийн 5, 6, 7-р хорооны нутаг дэвсгэр дэх Ханын материал орчмын хэсэгчилсэн ерөнхий төлөвлөгөө, 47,5 га газарт  "ЖиДи" ХХК,  Сонгинохайрхан дүүргийн 10-р хорооны нутаг дэвсгэр дэх Арьс ширний үйлдвэрийн ажилчдын байр орчмын хэсэгчилсэн ерөнхий төлөвлөгөө, 11,5 га газарт "Назу групп" ХХК, Баянзүрх дүүргийн 13, 14-р хорооны дэсвгэр, Орон сууцны 14-р хорооллын хэсэгчилсэн ерөнхий төлөвлөгөө 12,1 га газарт "Бэрэн групп" ХХК,  Чингэлтэй дүүргийн 9, 10, 11-р хорооны нутаг дэвсгэр Дэнжийн 1000 орчмын хэсэгчилсэн ерөнхий төлөвлөгөө 50,2 га газарт "Өндөр буянт" ХХК гэр хорооллын дахин төлөвлөлтийн төсөл хэрэгжүүлэхээр боллоо гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Монголын уламжлалт сар шинийн баярыг угтан нийслэлийн иргэдийн ая тухтай ажиллаж амьдрах таатай орчин, нөхцөлийг бүрдүүлэх зорилгоор Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал 2014 оны 01 сарын 10-ны өдөр “Сар шинийн баярыг угтсан бүх нийтийн цэвэрлэгээний ажлын удирдамж”-ийг батлан гаргалаа.  Удирдамжийн дагуу 2014 оны 01 сарын 18 буюу энэ бямба гарагийг бүх нийтийн их цэвэрлэгээний өдөр болгож, 01 сарын 19-нөөс 02 сарын 05-ны өдрүүдэд эрчимжүүлсэн цэвэрлэгээ хийхээр болжээ. Бүх нийтийн их цэвэрлэгээнд нийслэлийн 9 дүүргийн тохижилт, үйлчилгээний байгууллага, нийслэлийн нутаг дэвсгэрт үйл ажиллагаа явуулж буй бүх аж ахуйн нэгж, байгууллага, хороо, СӨХ, иргэд оролцох юм. 

 

Иргэд өөрсдийн амьдарч буй орон сууц, хашааны гаднах талбайн хогийг цэвэрлэх бол аж ахуйн нэгж байгууллагууд нийслэлийн ИТХ-ын Тэргүүлэгчдийн 2012 оны 11-р сарын 13-ны өдрийн 61-р тогтоолоор заасан орчны 50 метр хүртэлх нийтийн эзэмшлийн гудамж, зам талбайн цэвэрлэгээг хийнэ. Тодруулбал автозам, явган хүний зам талбайн цас, мөсийг цэвэрлэж халтиргаа гулгааг арилгах,  нийтийн эзэмшлийн гудамж, зам, талбай, гэрлийн шонгийн доор үүссэн хог, орон сууц, гэр хорооллын дунд, гуу жалганд үүсэж хуримтлагдсан хог хаягдлыг цэвэрлэх юм.  Мөн их цэвэрлэгээнд их, дээд сургууль, Ерөнхий боловсролын сургуулийн ажилтан, суралцагчдыг хамруулахаар болсон байна. Харин аж ахуйн нэгж, айл өрхийн хог хаягдлыг уртасгасан цагаар ачихаар зохицуулалт хийжээ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.