Сонгинохайрхан дүүргийн 9, 62-р сургуулиуд сэтгэл зүйчийн жишиг өрөөтэй боллоо. “Канад сангийн орон нутгийн санаачлага” хөтөлбөрийн хүрээнд Монгол улсад суугаа Канад улсын элчин сайдын яам “Хэрэглээний Сэтгэл Судлалын Хүрээлэн” ТББ хамтран нийслэлийн 5 сургуульд уг жишиг өрөөг байгуулжээ.

Түүний 2 нь манай дүүргийн сургууль байгаа бөгөөд нөгөө 3 нь 72, 74, 85 зэрэг сургуулиуд аж. Сэтгэл судлаач ажиллах олон улсын стандартад нийцсэн тавилга, сэтгэл зүйн оношилгоо, зөвлөгөөнд шаардлагатай техник болон сургалтын хэрэгсэл зэрэг шаардлагатай бүхнээр өрөөг тохижуулжээ.

Жишиг өрөө нь сэтгэл зүйч болон зөвлөгөө авч буй хүүхдийн хооронд итгэлцэл бий болгох, халуун дотно яриа өрнүүлэх, асуудлыг оношлох, сэтгэл засал хийх нөхцөл бүрдүүлсэн дуу чимээ нэвтэрдэггүй хана, зориулалтын ширээ, сандал, буйдан бүхий өрөө аж.

Сургууль бүрт сэтгэл зүйч ажиллах зайлшгүй шаардлага байгааг сургуулийн орчинд гарч байгаа зөрчилүүд, хүүхдийн эрхийг хамгаалах чиглэлээр үйл ажиллагаа явуулдаг олон улсын байгууллагуудын судалгаа, өсвөр насны сурагчдын гэмт хэрэгт холбогдох тохиолдол буурахгүй байгаа зэргээс харж болохоор байна.

Сэтгэл зүйч сургуульд ажилласнаар олон асуудлыг нээн илрүүлэх, урьдчилан сэргийлэх, сэтгэл зүйн тусламж шаардлагатай сурагчдад мэргэжлийн зөвлөгөө өгөх, сургалт, таниулгын ажил зөвхөн сурагчдад бус багш нар, эцэг эхчүүдэд зохион байгуулдаг тул эерэг нөлөөллийг бий болгох боломжтой юм байна.

Нийслэлийн алслагдсан дүүргийн 30 гаруй сургуулиудад “Дэлхийн Зөн Монгол” олон улсын байгууллагын санхүүжилтээр мэргэжлийн сэтгэл зүйчдийг ажиллууулж байгаа юм. Энэ төслийн хүрээнд, эрхийн зөрчлийг илрүүлэх, хүчирхийллээс урьдчилан сэргийлэх, сурагчдын сэтгэл зүйн тулгамдсан асуудлыг илрүүлэх, тусламж үйлчилгээ үзүүлэх зорилготой ажиллан, зохих үр дүнд хүрсээр байна.

            Сонгинохайрхан дүүргийн ИТХ-ын 7-р хуралдаан яг одоо хуралдаж байна. Хуралдаанаар тэргүүлэгчдийн бүрэлдэхүүнд өөрчлөлт оруулах тухай, дүүргийн эдийн засаг, нийгмийг 2018 онд хөгжүүлэх үндсэн чиглэлийн биелэлтийг хэлэлцэж, үнэлэлт дүгнэлт өгөх тухай, Засаг даргын 2016-2020 оны үйл ажиллагааны хөтөлбөрийн биелэлтийг хэлэлцэж, үнэлэлт дүгнэлт өгөх тухай, дүүргийн эдийн засаг нийгмийг 2019 онд хөгжүүлэх үндсэн чиглэл батлах, орон нутгийн хөгжлийн сангийн хөрөнгө оруулалтаар 2019 онд хийгдэх ажлын жагсаалт батлах тухай, зарим хороодыг өөрчлөн зохион байгуулж, хороо байгуулах тухай зэрэг асуудлуудыг хэлэлцэж, батлах юм.

Хөдөлмөр, нийгмийн хамгааллын яамнаас баталсан “Ахмад мэргэжилтний зөвлөх үйлчилгээг хөгжүүлэх хөтөлбөр”–ийн хүрээнд “Үнэ цэнэтэй ахмадууд” төслийг “Шинэ хөгжлийн түлхүүр” ТББ-тай хамтран хэрэгжүүлж, нийслэлийн хэмжээнд анх удаа төрийн захиргаа, хөдөө аж ахуй, боловсрол, эрүүл мэнд гэсэн 4 салбарт ахмад мэргэжилтнүүдийн хуримтлалын бүлэг байгуулагдан нийт 60 ахмад мэргэжилтэн хамрагдаж, бүтэн жилийн турш ахмад мэргэжилтний зөвлөх үйлчилгээг үзүүлэхийн зэрэгцээ, хуримтлалын бүлийн үйл ажиллагааг олон улсын аргачлалын дагуу амжилттай хэрэгжүүлж бодит үр дүн гарган ажиллалаа.

Бүлгүүд сар бүр Хөдөлмөр, халамжийн үйлчилгээний хэлтэс дээр тогтмол нэг өдөр нэг цагт цугларч, бүлгийн хурлаа хийж,  зөвлөхийн ёс зүй, хандлага, эдийн засгийн мэдлэгийг нэмэгдүүлэх, иргэдийн оролцоонд суурилсан төслөөр дамжуулан тэднийг нийгмийн хариуцлагын хүрээнд татан оруулах боломжийг бий болгох, шинээр ахмадууд нийлэн хамтдаа ажлын байр бий болгох боломжийг бүрдүүлэх, насан туршийн боловсрол чадваржуулах сургалтаар дамжуулан тухайн ахмад нэг бүрийн хувь хүний хөгжлийг дээшлүүлэхэд нөлөөлөх зэрэг сонирхолтой мэдээ мэдээлэл, сургалт, зөвлөгөөг  мэргэжлийн багшаас авч бүлгийн гишүүдийн төрсөн өдөр, шагнал урамшууллыг хамтдаа тэмдэглэж, өвдсөн зовсон нэгэндээ сэтгэлийн дэм өгөх, өөрийн эдийн засгийн чадавхийг нэмэгдүүлэн хадгаламж хуримтлалтай болох, орлогоо нэмэгдүүлэх, тэдний амьдралын чанарыг сайжруулах үндсэн зорилготойгоор үйл ажиллагаа чиглүүлэн ажилласан байна.

Сонгинохайрхан дүүргийн Нэгдсэн эмнэлэг хэвтэн эмчлүүлэх 165 ортой хэдий ч томуу томуу төст өвчний дэгдэлт ихэсдэг өвлийн улиралд дунджаар 300 орчим хүүхдийг хэвтүүлэн эмчилдэг.  

Бид эмнэлгийн  ашиглах боломжтой өрөө тасалгаануудыг бүгдийг нь тасаг болгож, корридортоо ор тавьж, хүүхдүүдээ хүлээн авч байна. Гэсэн хэдий ч шаардлагатай зарим тоног төхөөрөмжийн хүрэлцээ хомс.

Харин Biznetwork.mn-ний дэргэдэх “Алтан ураг” сан хүмүүнлэгийн 25 дах төслөө хэрэгжүүлж, Нэгдсэн эмнэлэгт 2 төрлийн 4 утлагын аппаратыг хүлээлгэн өглөө.

Өвлийн улирал эхэлж, утаа ихэссэнтэй холбоотой ханиад томууны дэгдэлт улам бүр ихэссэн. Энэ үеэр Улсын хүүхдийн эмнэлгүүд ачааллаа 80 орчим хувь хэтрүүлж эмчилгээ хийдэг учир зарим тоног төхөөрөмж хангалттай хүрэлцэхгүй байна.

Нийт хэвтэн эмчлүүлж байгаа хүүхдүүдийн 90% нь амьсгалын замын цочмог халдвараар өвчилсөн 0-5 насны хүүхдүүд байна. Эдгээр хүүхдүүдэд утлагын аппаратын тусламжтайгаар эмийн бодисыг амьсгалын замд оруулж эмчилгээ хийснээр хурдан үр дүнгээ өгдөг.

     Дүүргийн Засаг даргын 2018 оны А/181 дүгээр захирамжаар дүүргийн төрийн өмчийн сургууль, цэцэрлэгүүдийн дунд зохион байгуулагдсан “Шилдэг байгууллага-2018” болзолт уралдааны дүн гарч, шилдэг байгууллага, хүмүүсийг шагнаж урамшууллаа.

            Шагнал гардуулах ажиллагаанд дүүргийн Иргэдийн төлөөлөгчдийн хурлын дарга Б.Мөнхцэцэг, Засаг дарга Ж.Сандагсүрэн, Засаг даргын Тамгын газрын дарга Д.Төмөрбаатар, Боловсролын хэлтсийн дарга Э.Дүүдээ нар болон албаны хүмүүс оролцов.

            Ерөнхий боловсролын сургуулиудаас 1 дүгээр байрыг 65 дугаар сургууль, 2 дугаар байрыг 104 дүгээр сургууль, 3 дугаар байрыг 67, Ирээдүй цогцолбор сургууль, Сургуулийн өмнөх боловсролын байгууллагуудаас 1 дүгээр байрыг 105 дугаар цэцэрлэг, 2 дугаар байрыг 91 дүгээр цэцэрлэг, 3 дугаар байрыг 101, 170 дугаар цэцэрлэг шалгарч, үнэ бүхий зүйлээр шагнуулав. 

Төрийн заxиргааны үйлчилгээний үр ашиг болон бүтээмжийг сайжруулаx, үйлчлүүлэгч болон үйлчилгээ xүргэгчдийн цаг зардлыг хэмнэx, төрийн үйлчилгээний төвлөрлийг сааруулаx зорилгоор төрийн зарим үйлчилгээг xороодод шилжүүлэx ажил үе шаттай xэрэгжиж байна. Иргэд үйлчилгээ авахдаа олон дахин явах, цаг хугацаа алдах, дараалал үүсэх зэрэг асуудлууд их гардаг учраас энэхүү ажлыг шат дараатай хэрэгжүүлж байна. НЗДТГ-аас  төрийн үйлчилгээний чанар xүртээмжийг дээшлүүлэx, нийслэлийн үйлчилгээний  нэгдсэн төв, дүүрэг, ТҮЦ машинаас xол байгаа xороодод үйлчилгээг байршуулаx ажлыг шат дараатай xийж байна. Энэхүү ажлын танилцуулга, нээлтийн ажиллагаа  Чингэлтэй дүүргийн 16 дугаар хороонд боллоо.

Иргэд харьяалал харгалзахгүйгээр доорх хороодоос үйлчилгээ авах боломжтой юм.

-       Баянзүрх дүүргийн 18 дугаар хороо

-       ХУД-ын 7 дугаар хороо

-       Баянгол дүүргийн 5 дугаар хороо

-       СХД-ын 11 дүгээр хороо

-       Сүхбаатар дүүргийн 20 дугаар хороо

-       Чингэлтэй дүүргийн 16 дугаар хороо

-       Налайх дүүргийн 7 дугаар хороо

Үйлчилгээ үзүүлдэг хороодын тоог ирэх онд нэмэxээр төлөвлөж байна. Ингэxдээ иргэдийн xэрэгцээнд нийцсэн, үйлчилгээний чанар xүртээмжийг сайжруулаx бодлогыг барьж байгаа юм.

Ерөнхий боловсролын сургуулийн төгсөгчид их, дээд сургуульд орохын тулд элсэлтийн ерөнхий шалгалт өгч, шалгалтын онооноосоо хамааран сургуулиа сонгодог.

Сонгинохайрхан дүүргийн төгсөгчид уг шалгалтын оноогоор төдийлөн дээгүүрт жагсдаггүй нь сүүлийн жилүүдэд нийслэлийн хэмжээнд 6, 7-р байруудад жагссан үзүүлэлтээс харагдана.

Энэ нь нэг талаас сурагчдын сурлагын чанартай холбоотой мэт боловч өргөн утгаар нь авч үзвэл сургалтын орчин, багш нарын чадавх, эцэг эхийн дэмжлэг зэрэг маш олон хүчин зүйлээс хамааралтай.

Эдгээр асуудлуудыг шийдвэрлэж, ерөнхий боловсролын сургуулиа төгсөж буй хүүхдүүдэд цаашид чанартай их, дээд сургуульд хүссэн мэргэжлээрээ элсэхэд нь туслах үүднээс дүүргийн удирдлагууд боловсролыг дэмжих дэд хөтөлбөрийн хүрээнд “UP” төслийг эхлүүлж, өнөөдөр төслийн танилцуулгыг хийлээ.

Цаашид жил бүр тогтмол хэрэгжих уг төслийн нээлтэд 1500 орчим сурагч, сургуулиудын захирал, багш нар мөн сурагчдын эцэг эхийн төлөөлөл ирж, төслийн талаарх мэдээлэл, дүүргийн зүгээс төслөөр дамжуулан хүүхдүүдэд ямар боломж олгож байгаа мөн эцэг, эхчүүд юун дээр анхаарах ёстойг хэлэлцсэн юм.

Төслийн танилцуулгын үеэр Засаг дарга Ж.Сандагсүрэн “Бид Сант, Олонлог зэрэг хувийн сургуулиудын багш нартай хамтран ажиллана. Дүүргийн 4 бүсэд сонгоны анги хичээллүүлнэ. Хамгийн гол нь хүүхдүүд өөрсдөө хичээх хэрэгтэй. Мөн бид багш нарынхаа чадавхыг дээшлүүлэх хөтөлбөр хэрэгжүүлж байна.

Жил бүр багш нар руу чиглэсэн сургалт семинарыг хувийн болон улсын томоохон сургуулиудтай хамтран зохион байгуулна. ЭЕШ-ын оноогоороо тэргүүлсэн сурагчдаа бид гадны тэтгэлэгт хөтөлбөрт хамруулна.

Түүнчлэн сайн ажилласан, хүүхдүүдийнхээ оноог дээшлүүлсэн багш нартаа мөнгөн урамшуулал олгоно. Жишээ нь: Шилдэг 4 багшид тус бүр 10 сая төгрөг, 10 багшид тус бүр 2 сая төгрөг, 10 сургуулийг тус бүр 6 сая төгрөгөөр урамшуулна. Энэ бол ирээдүйн боловсон хүчин хүүхдүүдэд оруулж буй хөрөнгө оруулалт юм” гэж онцоллоо.

Дүүргийн эдийн засаг, нийгмийг 2018 онд хөгжүүлэх үндсэн чиглэлд алслагдсан 21 дүгээр хороонд төрийн архивын нэг цонхны үйлчилгээ нэвтрүүлэх зорилтыг дэвшүүлсэн.

Дүүргийн Засаг даргын Тамгын газар болон хорооны зүгээс бэлтгэл ажлыг сайтар хангасны үр дүнд өнөөдөр нээлтийн арга хэмжээ боллоо.

Нээлтийн арга хэмжээнд дүүргийн Засаг даргын Тамгын газрын дарга Д.Төмөрбаатар, Нийслэлийн архивын газрын хэлтсийн дарга Т.Хүрэлжав, дүүргийн 21 дүгээр хорооны Иргэдийн нийтийн хурлын дарга С.Чулуунбат, хорооны Засаг дарга бөгөөд Жаргалант тосгоны захирагч Б.Мягмарсүрэн нарын албаны хүмүүс оролцов.

Хорооны иргэд нээлтийн арга хэмжээнд өргөн оролцож, төрийн архивын нэг цонхноос хороон дээрээсээ 21 төрлийн лавлагаа авч, цаг, зардал хэмнэх болсондоо сэтгэл хангалуун байгаагаа илэрхийлж байв. 

 

 

   

 

Сонгинохайрхан дүүргийн 2019 оны төсөв, Газар зохион байгуулалтын төлөвлөгөөний төслүүдэд иргэн, аж ахуйн нэгж, байгууллага, төрийн болон төрийн бус байгууллагын саналыг сонсох, мэдээлэл авах зорилгоор 12 дугаар сарын 5-ны 15:00 цагт дүүргийн иргэний танхимд Нийтийн сонсгол зохион байгуулах гэж байна.

           Уг сонсголыг Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 29 дүгээр зүйлийн 29.2, Нийтийн сонсголын тухай хуулийн 4 дүгээр зүйлийн 4.2, 9 дүгээр зүйлийн 9.3, 16, 17, 18 дугаар зүйл, Захиргааны ерөнхий хуулийн 26, 27, 73 дугаар зүйлийн 73.1.2 дахь заалт, Улсын Их Хурлын 2017 оны 12 дугаар тогтоолыг тус тус үндэслэн зохион байгуулах юм.

НҮБ-ийн Ерөнхий Ассамблэйгээс жил бүрийн 12-р сарын 3-ны өдрийг Хөгжлийн бэрхшээлтэй иргэдийн эрхийг хамгаалах Олон улсын өдөр болгон “Хөгжлийн бэрхшээлтэй хүмүүсийн оролцоо, тэгш байдлыг хангаж, эрх мэдэлжүүлэх” уриан дор тэмдэглэн өнгөрүүлдэг.

Тэгвэл энэ өдрийг угтан Сонгинохайрхан дүүргийн Засаг даргын Тамгын газраас санаачлан “Хүртээмжтэй орчин, загвар дүүрэг” аяныг хэрэгжүүлэх гэж байна. Уг ажлын эхлэл болгож, “Хөгжлийн бэрхшээлтэй иргэдийн хөгжил, ажлын байрыг нэмэгдүүлэх арга зам” хэлэлцүүлгийн зохион байгууллаа.

Хэлэлцүүлэгт дүүргийн Засаг даргын Тамгын газрын хэлтэс алба болон Засаг даргын эрхлэх асуудлын хүрээний хэлтэс албад мөн дүүргийн нутаг дэвсгэрт үйл ажиллагаа явуулдаг аж ахуйн нэгж байгууллага, хөгжлийн бэрхшээлтэй иргэд, хөгжлийн бэрхшээлтэй иргэдийн эцэг, эхийн  төлөөлөл оролцсон юм.

Аяны хүрээнд төрийн болон хувийн хэвшлийн байгууллагуудын гадаад дотоод орчинд хөгжлийн бэрхшээлтэй иргэдэд ээлтэй орчин бүрдүүлэх түүнчлэн хамгийн гол нь хөгжлийн бэрхшээлтэй иргэдийг хөгжүүлэх жишиг байртай болох зэрэг санал санаачлагууд гарсан юм.

Жишиг байрны тухайд Нийгмийн даатгалын хэлтсийн дэргэд байрлах бөгөөд уг байрыг засварлахад 35 сая төгрөг шаардлагатай байгаа аж. Харин хэлэлцүүлгийн үеэр аж ахуйн нэгж байгууллагын төлөөллүүд бэлэн болон бус хандив өгч, уг байрыг нэн даруй ашиглалтад оруулахыг дэмжлээ.