Нийслэлийн удирдах ажилтнуудын ээлжит шуурхай зөвлөгөөн өнөөдөр болж, зарим дүүргийн Засаг дарга нар цаг алдалгүй шийдвэрлэх шаардлагатай ажлуудаа танилцууллаа.
Сонгинохайрхан дүүргийн Засаг дарга М.Чинболд тус дүүргийн 62-р сургуулийн барилгын өнгөлгөөний тоосгон хана ялуутайгаа хөндийрч, унаж байгаа талаар мэдээлж, яаралтай засварлахад шаардлагатай 210 сая төгрөгийг шийдвэрлэж өгөхийг хүслээ.
Сонгинохайрхан дүүргийн 62-р сургууль нь 1975 онд байгуулагдсан.  

 

1-8-р ангийн 44 бүлэгт 1304 сурагч 51 багш, ажилчидтайгаар сургалтын үйл ажиллагаа явуулж эхэлж байсан бол одоо 2800 гаруй сурагч, 160 орчим багш ажилтантай ажиллаж байгаан байна. Тус сургуулийн барилгын зураг төслийг барилгын зургийн институтэд боловсруулж 1974 онд холболт хийсэн бөгөөд барилга угсралтын ажлыг хотын барилга трестийн 2-р контор гүйцэтгэж 1976 онд ашиглалтад оруулжээ. Сургуулийн барилга нь 920 хүүхдийн хүчин чадалтай 3 н давхар тэнхлэгээрээ 15м х 45м, 9.0м х 54м, 12м х30м –ийн хэмжээтэй 3 н блоктой П хэлбэртэй, угсармал бетон суурьтай, өнгөлгөөний тоосгон ханатай төмөр бетон нүхтэй хавтан хучилттай, хар цаасан хучлагат хавтгай дээвэртэй, халаалт цэвэр, бохир усны төвлөрсөн шугам сүлжээнд холбогдсон. Барилгыг ашиглалтад оруулснаас хойш дээвэр, цонх, дотор халаалт бохир усны систем, биеийн тамирын талбайн тохижилт,  гадна зам зэрэгт  хэсэгчилсэн  засвар хийгдэж байжээ.
Харин 12-р сараас хойш барилгад нуралт үүсч эхэлсэн байна. Яаралтай засварлахгүй бол өнгөлгөөний тоосго цүлхийж хөндийрсэн хэсэг, дахиад нурж болзошгүй 4 газар байгаа гэж дүүргийн Засаг дарга хэллээ.
Нийслэлийн Засаг дарга тус сургуулийн барилгын гэмтэл, нуралттай яаралтай танилцаж, урсгал засвар хийх үү эсвэл шинээр барих уу гэдгийг тодорхой болгож шийдвэрлэхийг нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбатад үүрэг болголоо.
Багануур дүүргийн Засаг дарга М.Гончигжав тус дүүргийн 3-р хорооны нутаг дэвсгэр 52 дугаар байрны арын төв зам доогуур хөндлөн хойд чиглэлд гардаг хэсэгт авто замын суулт өгсний улмаас  дулааны шугам дарагдаж гэмтэл гарсан талаар мэдээллээ.
Уг гэмтэл гарсны улмаас өвлийн ид ачааллын үед сүлжээний усны алдагдал нэмэгдэж, уур цан савссан байдалтай энэ өвлийг давжээ. Шугамын хэсэгт үзлэг шалгалт хийхэд эхний ээлжинд авто замын арын дулаан хуваарилах  худгаас урд чиглэлд 80м орчим хос шугам сүлжээ, арматур туслах төхөөрөмжийн хамт бүрэн шинэчлэгдэх шаардлагатай нь тогтоогдсон байна. Тиймээс энэ шинэчлэлийн ажлыг хийх 46 сая төгрөгийг нийслэлээс шийдвэрлэхийг Багануур дүүргийн Засаг дарга М.Гончигжав хүссэн юм.
Харин нийслэлийн Засаг дарга холбогдох албаныхныг газар дээр нь очиж танилцаж, шийдвэрлэхийг үүрэг болголоо.
Мөн Багануур дүүргийн Засаг дарга М.Гончигжав “Тус дүүрэгт эрчим хүчний хэмнэлттэй зуух 795 иргэнд өгсөн нь тодорхой үр дүнгээ өгч 2012 оноос 2013 онд агаарын бохирдлын хэмжээ буурч, сайжирсан үзүүлэлттэй гарсан. Өнөөдрийн байдлаар зуух авах шаардлагатай 4000 гаруй иргэн байгаа тул энэ асуудлыг судалж үзэн, шийдвэрлүүлэх хүсэлтэй байна” гэлээ.
Уг асуудалд нийслэлийн Засаг даргын Экологи, ногоон хөгжлийн асуудал хариуцсан орлогч Т.Бат-Эрдэнэ “Эрчим хүчний хэмнэлттэй зуух тараах ажлыг өөр байдлаар зохион байгуулахаар төлөвлөж байгаа. Багануур дүүрэгт зайлшгүй шаардлагатай иргэдэд ирэх намар олгоно” гэж хэллээ гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Улаанбаатар хотын 375 жилийн ойг угтан Сонгинохайрхан дүүргийн Тамгын газраас хэрэгжүүлж буй “Хотын соёл” төслийн албан ёсны нээлт 4 дүгээр сарын 18-ны Баасан гарагт боллоо.

Тус төслийн хүрээнд “Хотын соёл”-ын талаар дүүргийнхээ ЕБС-иудын сурагчид, Их сургуулийн оюутан залуусыг хамарсан Илтгэл, хэлэлцүүлэг зохион байгуулж, хэлэлцүүлэгээс гарсан санал, санаачилагыг Нийслэлийн Засаг даргад хүргүүлнэ.

 

Мөн дүүргийн Нутгийн захиргааны байгууллагууд, үйлдвэрлэл, үйлчилгээ эрхлэгч аж ахуйн нэгж байгууллагуудад “Хотын соёл-Биднээс эхэлнэ” санаачилагын туг аялуулах үйл ажиллагааг зохион байгуулах бөгөөд энэхүү аянаар туг хүлээн авсан байгууллага өөрийн нөхцөл, онцлогийн хүрээнд “Хотын соёл”-д бодит хувь нэмэр оруулах ажлуудыг зохион байгуулан, тайланг Засаг даргын Тамгын газарт хүргүүлэх юм. “Санаачлагын туг” уралдаант аяныг ирэх 10 дугаар сард дүгнэн Нийслэлийн өдрөөр шагнаж урамшуулах юм. Шилдэг “Хотын соёл”-ыг хэрэгжүүлэгч Хэлтэс, Аж ахуйн нэгж тус бүр нэгийг шалгаруулж 500,000 төгрөгөөр урамшуулна.

Эдгээрээс гадна тус төслөөр цэцэрлэгийн хүүхдүүдэд “Хог хаях дадал суулгах хичээл” орох, Хотын соёлд бүтээлчээр оролцсон шилдэг Ахмадын бүлэг шалгаруулах, Эссэ бичлэгийн уралдаан явуулах, дүүргийн хэмжээний нийт орон сууцыг дугааржуулах зэрэг олон ажлыг хэрэгжүүлэхээр төлөвлөөд байна.

“Хотын соёл” төслийн нээлтийн үеэр Засаг дарга М.Чинболд  санаачилагын тугийн дүүргийн “Тохижилт, үйлчилгээ, цэвэрлэгээ” ОНӨААТҮГ-ын хамт олонд гардуулж өглөө.  Мөн “Ирээдүй” цогцолбор сургуулийн ахлах ангийн сурагчдад Засаг дарга М.Чинболд, МУГЖ Н.Батцэцэг нар “Хотын соёл”-ын талаар илтгэл тавьж хэлэлцүүлэг явууллаа.

Мөн дүүргээс хэрэгжүүлж буй “Архигүй Баасан гараг” хөтөлбөртэй уялдуулан төслийн хугацаанд долоо хоног бүрийн Баасан гарагт дүүргийн нутаг дэвсгэрт задгай талбайд урлагийн тоглолт явуулах бөгөөд эхний тоглолт нээлтийн өдөр “Соёмбо” кино театрын урд талбайд болсон. Жаргалант тосгонд байрлах Сонгинохайрхан дүүргийн Соёлын ордны уран бүтээлчид бүрэн хэмжээний тоглолт хийж иргэд, үзэгчдийн мэлмий, сонорыг баясгалаа.

Төслийн талаарх мэдээ мэдээллийг facebook.com/khotiin.soyol,  twitter.com/khotiin_soyol, shd.mn цахим хуудсуудаар тогтмол авах боломжтой.

Төсөл нийслэлийн ойн өдөр буюу 10 дугаар сарын 29 хүртэл үргэлжилнэ.

Дүүргийн Засаг даргын 2014 оны А/99 дугаар захирамж гаргаж ажлын хэсэг байгуулан дүүргийн хэмжээнд их цэвэрлэгээ зохион байгууллаа.

Ажлын хэсгийг Засаг даргын хот байгуулалт, тохижилтын асуудал хариуцсан орлогчоор ахлуулан 9 хүний бүрэлдэхүүнтэйгээр байгуулж, их цэвэрлэгээ зохион байгуулж хамтран оролцох байгууллага, тэдгээрийн хүлээх үүрэг, их цэвэрлэгээний ажлын үндсэн чиглэл, Засаг даргын Тамгын газрын хэлтсүүдийн их цэвэрлэгээний ажлыг зохион байгуулж,  хяналт тавих хороодын хуваарь, ажлын төлөвлөгөө, нийтийн эзэмшлийн зам талбайн хог хаягдлыг цэвэрлэх хуваарийг гарган холбогдох хэлтэс албад, хороодод хүргүүллээ.

 

            Их цэвэрлэгээг зохион байгуулах ажлын хэсгийн бүрэлдэхүүн 2 удаа  хуралдаж ажлын чиглэлээ тодруулан үүрэг даалгавар авч оролцсон. Дүүргийн Засаг даргын Тамгын газрын хэлтэс албадууд дараахь байдлаар хороодыг хуваарилан авч цэвэрлэгээний явцад хяналт тавьж ажилласан. Үүнд.

Хэлтэс, албад

Хариуцах хороод

1

Захиргаа хуулийн хэлтэс А.Пүрэвсүрэн

Төвийн бүс 5, 6, 7, 18, 19, 23, 27,  29 дүгээр хороод, тухайн хорооны СӨХ-үүд

 

Нийгмийн хөгжлийн хэлтэс Б.Оюунбилэг

 

Толгойт бүс  2, 3, 4,  26, 32 дугаар хороод,  Төсөвт газрууд,

 

Худалдаа үйлчилгээний хэлтэс Г.Ууганбаяр

Өнөр бүс 12, 13, 14, 15, 16, 17 дугаар хороод,  тухайн хорооны СӨХ-д, Үйлдвэр, үйлчилгээний газрууд

2

Эдийн засаг төлөвлөлтийн хэлтэс Баярмагнай

30, 31 дүгээр хороо

4

Санхүү төрийн сангийн хэлтэс С.Болорцэцэг

Баянхошуу бүс 8, 9, 10, 11, 24, 25, 28 дугаар хороод

5

Цэргийн штаб А.Баттулга

1, 20, 22 дугаар хороод, Цэргийн ангиуд

6

Дэд бүтэц, тохижилтын хэлтэс Т.Сүхбаатар

Бүх хороод

7

Мэргэжлийн хяналтын хэлтэс С.Ганболд

Бүх хороодод хяналтын улсын байцаагч ажиллуулах

 

            Дүүргийн хэмжээнд  Тохижилт цэвэрлэгээ үйлчилгээ ОНӨААТҮГ 2, 3, 4, 9, 10, 12, 13, 14, 18, 23, 25, 28, 31 дүгээр хороодод хог тээврийн 20  машинаар, Тээвэрлэлт үйлчилгээний төв 1, 11, 16, 17, 19, 20, 22, 24, 26, 29, 30 ,32 дугаар хороодод  хог тээврийн 20 машинаар, Нийтлэг үйлчилгээний төв 5, 6, 7, 8, 15,  27 дугаар хороодод 8 машинаар  нийтдээ 48 хог тээврийн автомашинаар 137 рейс хогийг Нарангийн  төвлөрсөн хогийн цэгт тээвэрлэн хүргэлээ. 

            Бүх нийтийн их цэвэрлэгээний ажилд нийт 1253 аж ахуйн нэгж байгууллагын  13595 хүн оролцсоноос Ерөнхий боловсролын сургууль, их дээд сургуулиудын 3243 оюутан, сурагчид нийтийн эзэмшлийн зам талбайд түүвэр цэвэрлэгээ хийж идэвхтэй оролцлоо.

            Мөн Монголын хог хаягдлыг дахин боловсруулах үндэсний холбооноос портер маркын 10 автомашинаар оюутан сурагчдын цэвэрлэсэн талбайн хог хаягдлыг тээвэрлэн Нарангийн төвлөрсөн хогийн цэгт хүргэсэн.

            Дүүргийн Мэргэжлийн хяналтын хэлтсийн 28 улсын байцаагч хороод хариуцан ажиллаж  1050 аж ахуйн нэгж байгууллагад мэдэгдэх хуудас өгч ажилласан байна.

            Их цэвэрлэгээнд дараах аж ахуйн нэгж, байгууллагууд хангалтгүй оролцсон буюу огт оролцоогүй байна. Эдгээр байгууллагуудад хууль тогтоомжын дагуу хариуцлага тооцох юм.

  1. 16 дугаар хорооны нутаг дэвсгэрт үйл ажиллагаа явуулдаг “Соёлт” СӨХ, “Го-дун” эмнэлэг, “Плэнти” хүнсний дэлгүүр
  2. 29 дүгээр хорооны нутаг дэвсгэрт үйл ажиллагаа явуулдаг “Өргөө майнинг” ХХК, “Найзууд” цэцэрлэг, “Зузаахай” цэцэрлэг, “Мон-гео” ХХК, “Макс” худалдааны төв, “888” зочид буудал, “Драгон” холдинг, “Москва-10” СӨХ, “Магнай трейд” ШТС, “Талх чихэр” ХХК
  3. 18 дугаар хорооны нутаг дэвсгэрт үйл ажиллагаа явуулдаг Холбооны 37-р салбар, “Гурван баян” ХХК
  4. 13 дугаар хорооны нутаг дэвсгэрт үйл ажиллагаа явуулдаг Дүүргийн прокурор
  5. 19 дүгээр хорооны нутаг дэвгэрт үйл ажиллагаа явуулдаг “Дөлгөөн” караоке, Нийгмийн даатгалын хэлтэс
  6. 11 хорооны нутаг дэвсгэрт үйл ажиллагаа явуулдаг “Том мянган” ХХК, “Овоот трейд” ХХК

Их цэвэрлэгээний явцаас

          

Дүүргийн нэгдсэн эмнэлгийн орчмын цэвэрлэхээс өмнө, цэвэрлэсний дараа

          

62 дугаар сургуулийн сурагчид нийтийн эзэмшлийн зам талбайн цэвэрлэгээнд

         

17 дугаар хорооны иргэдийн цэвэрлэгээнд оролцож байгаа байдал

         

26 дугаар хорооны жалга цэвэрлэхийн өмнө, цэвэрлэсний дараа

         

10 дугаар хороо АШҮ-ийн 60 айлын орчим цэвэрлэхийн өмнө, цэвэрлэсний дараа

29 дүгээр хороо байгууллага, аж ахуйн нэгжүүд цэвэрлэгээнд оролцсон байдал

          

30 дугаар хороо Чулуутын 8-р гудамж цэвэрлэхийн өмнө, цэвэрлэсний дараа

          

 

Нийслэлийн Засаг даргын захирамжийн дагуу өнөөдөр буюу  4 дүгээр сарын 19-ний өдөр Бүх нийтийн цэвэрлэгээг Улаанбаатар хот даяар зохион байгуулж байна.

Үүнтэй холбогдуулан Сонгинохайрхан дүүргийн Засаг дарга захирамж гарган ажлын хэсэг байгуулсан бөгөөд тус ажлын хэсэг өнөөдөр  дүүргийнхээ хэмжээнд Бүх нийтийн цэвэрлэгээг зохион байгуулж байна. Дүүргийн хэмжээний бүх төрийн болон төрийн бус өмчит байгууллага, нийт 32 хороо,  сургууль, цэцэрлэгүүд, аж ахуйн нэгж, иргэдийг хамруулсан  их цэвэрлэгээ зохион байгуулалт сайтай,  байгууллага иргэдийн оролцоо өндөр үргэлжилж байна.

 

Энэ их цэвэрлэгээгээр Сонгинохайрхан дүүрэг өнгөрсөн өвөл хуралдсан хур хогноосоо салах зорилго тавьж байгаа юм. Урин цагийг Улаанбаатар хот цэвэр цэмцгэр угтна.

Их цэвэрлэгээ өнөөдөр орой бүх хороодоос мэдээ авч Нйислэлийн Засаг даргын Тамгын газарт илгээснээр дуусна. 

Нийслэлийн Засаг даргын Тамгын газраас Улаанбаатар цэргийн хүрээний анги байгууллагуудын дунд тэргүүний тохижилттой,  жагсаалч анги хамт олон шалгаруулах  “Монгол цэргийн жавхаа” уралдаан зарласан билээ. Тус уралдааныг дүгнэх комисс өчигдөр буюу 4 дүгээр сарын 14-ний өдөр Сонгинохайрхан дүүргийн нутаг дэвсгэрт байрлах Зэвсэгт хүчний 017 дугаар анги дээр ирж тохижилтын байдалтай танилцаж жагсаалын үзлэг хийлээ.

 

Энэ үеэр тус дүүргийн Засаг дарга М.Чинболд мөн хүрэлцэн ирж үзлэгийн байдалтай танилцлаа. Засаг дарга М.Чинболд өнгөрсөн 3 дугаар сард дүүргийнхээ нутаг дэвсгэрт байрлах цэргийн ангиудын захирагч нартай хамтран ажиллах санамж бичигт гарын үсэг зурсан. Санамж бичигт дүүргийн тохижилт бүтээн байгуулалтад цэргийн ангиудтай хамтарч ажиллахаар тусгасан юм.

ЗХ-ий 017 дугаар анги нь барилга угсралт, засвар үйлчилгээний үйл ажиллагаа явуулдаг. Энэ уралдаанд тус ангийг дээгүүр байр эзлэнэ гэж найдаж байгаагаа  Засаг дарга илэрхийллээ.

“Монгол цэргийн жавхаа” уралдаан 5 дугаар сарын 03-нд дүнгээ гаргана.

Энэ жил  Хувьсгалчдын гудамж, Зурагтын шинэ эцсийн буудлаас Баянхошууны уулзвар хүртэлх 4.6 км авто замыг өргөтгөн шинэчилнэ. Тус замын ажлын тендерийг Нийслэлийн Худалдан авах ажиллагааны газраас зарлаж  тендерт "Экспресс зам" ХХК шалгаран Нийслэлийн Авто замын газартай гэрээ байгуулжээ.  Гэрээнд зааснаар 2014.10.30-нд ажлаа хийж дуусгах юм байна. Тус замыг өргөтгөхтэй холбогдуулан замын трасст орсон 200 гаруй айл өрхийн хашаа, объектыг татуулах шаардлагатай бөгөөд Нийслэлийн Өмчийн харилцааны газраас эдгээр айл өрхөд газар чөлөөлөх мэдэгдэл хүргүүлэн ажиллаж байна гэж Нийслэлийн Автозамын газраас мэдээллээ.

Нийслэлийн Засаг дарга “Хөрөнгө гаргах тухай” А/271 дугаар захирамж гаргалаа. Захирамжийн дагуу Хотын захиргааны шинэ цогцолбор барихтай холбогдуулан нийслэлийн Сонгинохайрхан дүүргийн 6 дугаар хорооны нутаг дэвсгэрт байрлах “Ханын материал” хувьцаат компанийн 9.2 га газрын үл хөдлөх хөрөнгө, барилга байгууламжийн хөрөнгийн үнэлгээг хийж, одоогийн зах зээлийн үнийг тогтоох ажлыг холбогдох хууль, журмын хүрээнд зохион байгуулж, хэрэгжүүлэхийг нийслэлийн Өмчийн харилцааны газарт үүрэг болголоо.

 

Үл хөдлөх хөрөнгө, барилга байгууламжийн хөрөнгийн үнэлгээг хийх, одоогийн зах зээлийн үнийг тогтоох ажилд шаардагдах хөрөнгийг Нийслэлийн Засаг даргын Тамгын газрын батлагдсан төсвийн төрийн өмнөөс гүйцэтгүүлсэн ажил, үйлчилгээний зардлаас санхүүжүүлэхийг Санхүү, төрийн сангийн хэлтэст даалгалаа гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн 9 дүүргээс хүн амын тоо, газар нутгийн хэмжээгээр хамгийн том нь Сонгинохайрхан дүүрэг. Эдгээр үзүүлэлтээрээ дэлхийн томоохон хотуудын гол дүүргүүдтэй зэрэгцэж очино. Гэвч оршин суугчдын хувьд их хотын иргэдийн түвшинд сэтгэж, төлөвшиж, амьдарч хэвшээгүй нь алхам тутамд мэдрэгдэж, анхаарал татсан асуудал болжээ. Үүнд дүүргийн Засаг дарга М.Чинболд анхаарал хандуулан “Хотын соёл” төслийг санаачлан энэ 04 дүгээр сарын 01-нээс  хэрэгжүүлж эхлээд байна.

 

Дүүргийн, цаашлаад Улаанбаатар хотын иргэдийг, тэр дундаа хүүхэд залуусыг их хотын соёлт иргэн болгон төлөвшүүлэх, хэвшүүлэхэд зохих үр дүнтэй, өмнө нь тэр бүр хийгдэж байгаагүй далайцтай хувь нэмэр оруулах зорилгоор хэрэгжиж буй энэхүү төслийн хүрээнд:

  • “Хотын соёл- Танаас эхэлнэ” Илтгэл, хэлэлцүүлэг
  • “Хотын соёл- Надаас эхэлнэ” эссэ бичлэгийн уралдаан
  • “Хотын соёл-Биднээс эхэлнэ” санаачлагын туг аялуулах зэрэг ажлууд хийгдэнэ.

Төслийг ЗДТГ-ын Хэвлэл мэдээлэл, олон нийттэй харилцах алба зохион байгуулан хэрэгжүүлж байна.

Сонгинохайрхан дүүргийн Засаг даргын Тамгын газраас иргэд, аж ахуйн нэгж, байгууллагуудад хандан тус дүүргийн 7 дугаар хорооны иргэн Э.Одбаярын охинд туслахыг уриалж байна.

О.Намуударь нь 2010 оны 04-р сарын 05 ны өдөр Улаанбаатар хотод төрсөн 4 настай. 2012 онд нялхасын эрүүл мэндийн төвийн эмчийн дүгнэлтээр төрөлхийн дүлий гэсэн дүгнэлтээр 2 чихний сонсголгүй гэдгийг мэдсэн. Иймд сонсгол оруулах эмчилгээг манай улсад үйл ажиллагаа эрхэлдэг Австри улсын хөрөнгө оруулалтай “AID” чих хамар хоолойн эмнэлэгт чихний дунгийн суулгацын мэс заслын хагалгаанд орох шаардлагатай байгаа тул эмчилгээний зардал болох 22,000,000 төгрөгт элэг нэгт Монгол ахан дүүс та бүхнийг сэтгэлийн хандив өргөхийг хүссэж байна.

 

Хандивийн данс: 5019189455 /Хаан банк/

Холбогдох утас: 96668647, 91168647

Сайн үйлс бүхэн дэлгэрэх болтугай

 

Дүүргийн Эрүүл аюулгүй байдлын үзүүлэлтийг дээшлүүлэх, иргэдийн амьдрах орчин нөхцлийг сайжруулах, ногоон орчин бүрдүүлэх зорилгоор ЗДТГ-ын Дэд  бүтэц, тохижилтын  хэлтсээс санаачлан   “Ногоон  дүүрэг-2014” аяныг өрнүүлж эхлээд байна. Энэхүү аяны хүрээнд    аж ахуйн нэгж байгууллага, иргэдийн    идэвх   санаачлагыг  өрнүүлэхээр   Монголын  Эко  Зохистой  хөгжлийн  холбоо,  Хайтан   цэцгийн  холбоо  ТББ-тай  хамтран  мод бут, сөөг,   мандлын  цэцэг  хэрхэн  тарьж  арчлан  тордож  ургуулах  талаар    үнэ  төлбөргүй  сургалтыг  зохион  байгууллаа.

 

Оршин суугаа орчиндоо ногоон орчин бүрдүүлэх, нийтийн эзэмшлийн зам талбайн ногоон байгууламжыг нэмэгдүүлэхэд оролцох сонирхол иргэдэд өндөр байлаа.

“Мандлын цэцгийн үрсэлгээ хийх,  мод үрээр тарьж үржүүлэх арга туршлага“ сэдэвтэй энэхүү сургалт өнгөрсөн 2 дугаар сараас 4 дүгээр сарыг хүртэл явагдаж тус дүүргийн 472 иргэн хамрагджээ.

ЗДТГ-ын Дэд  бүтэц, тохижилтын  хэлтсээс ногоон байгууламжийг нэмэгдүүлэхэд иргэдийн оролцоог хангах, мэргэжил, арга зүйн туслалцаа үзүүлж   чадваржуулах энэ төрлийн сургалтуудыг дахин зохион байгуулахаар төлөвлөн ажиллаж байна