Сонгинохайрхан дүүргийн Хүнс худалдаа үйлчилгээний хэлтсээс дүүргийн хэмжээнд үйл ажиллагаа явуулж буй иргэн, аж ахуйн нэгж байгууллагуудад тухайн салбарын цаашдын хөгжлийн чиг хандлага, дүүрэг орон нутгаас баримталж буй бодлого зэргийн талаар мэдээлэл өгч, үйл ажиллагаа явуулж буй хороонд нь уулзалт, сургалтуудыг хийж байна.

Өнгөрсөн хугацаанд хоол үйлдвэрлэл, хүнсний жижиг худалдаа эрхлэгчидтэй уулзалтуудыг хийсэн. Харин өнөөдөр үсчин, гоо сайхны үйлчилгээ эрхэлж байгаа иргэн, аж ахуйн нэгжийн удирдлагуудад зориулсан сургалт зохион байгууллаа.

Сургалтыг үсчин, гоо сайхны өнөөгийн байдал, цаашид анхаарах асуудлууд , хувь хүний хандлага зэрэг сэдвүүдээр хийлээ. Түүнчлэн сургалтад хамрагдсан оролцогчдыг Төрийн ордонтой танилцуулах аялал зохион байгуулах юм байна.

Нийслэлийн хэмжээнд анх удаа Гамшгаас хамгаалах иж бүрэн сургуулийг ирэх сарын 24-с 26-ны өдрүүдэд зохион байгуулах гэж байна. Болзошгүй аюулаас хүн, мал, амьтан, эд хөрөнгө, хүрээлэн байгаа орчныг хамгаалах, урьдчилан сэргийлэх, хойшлуулашгүй сэргээн босгох үйл ажиллагаанд нийслэлийн нутгийн захиргааны байгууллага, Гамшгаас хамгаалах алба, мэргэжлийн анги, сайн дурын хэсэг, иргэн, хуулийн этгээд, томилгоот бүрэлдэхүүнийг сургах, дадлагажуулах, гамшгаас хамгаалах бэлтгэл бэлэн байдлыг дээшлүүлэх, төлөвлөлтийг боловсронгуй болгох, харилцан ажиллагааг сайжруулах, нүүлгэн шилжүүлэлт, дайчилгааны тогтолцоог тодорхойлох зорилгоор зохион байгуулах юм.

Энэ хүрээнд Онцгой байдлын ерөнхий газрын дэд дарга Б.Ууганбаяр өнөөдөр Сонгинохайрхан дүүргийн Онцгой комисс, Гамшгаас хамгаалах алба, мэргэжлийн ангийнханд зөвлөгөө, мэдээлэл өглөө.

     Сонгинохайрхан дүүргээс сонгогдсон УИХ-ын гишүүд хамтран 2018-2019 онд улсын төсвийн хөрөнгөөр хийгдэх цэцэрлэг, сургууль, авто зам зэрэг бүтээн байгуулалтын ажлуудын явцын талаар холбогдох яам тамгын газрын албаны удирдлагуудтай төрийн ордонд уулзалт зохион байгууллаа.  

     Сонгинохайрхан дүүрэгт Дүүргийн төвлөрсөн төр захиргааны байр, 850 хүний суудалтай Соёлын төв баригдах зэрэг иргэдэд чиглэсэн олон томоохон бүтээн байгуулалтын ажлууд хийгдэнэ.

     Энэ онд СХД-ийн нэгдсэн эмнэлэг, эрүүл мэндийн төв баригдан ашиглалтад орно. Мөн 11 сургуулийн өргөтгөл болон шинэ барилга 22 цэцэрлэг шинээр баригдахаар төлөвлөж байна.  

УИХ-ын гишүүн Х.Нямбаатарын санаачилгаар хэрэгжиж буй “Шийдэл” төслийн хүрээнд өнөөдөр 143 хүн газрын гэрчилгээ гардан авлаа. Уг арга хэмжээнд УИХ-ын гишүүн Х.Нямбаатарын бие төлөөлөгч, дүүргийн Иргэдийн Төлөөлөгчдийн Хурлын Хот байгуулалт, байгаль экологи, газрын асуудал хариуцсан ажлын хорооны дарга Б.Баттулга, дүүргийн ИТХ-ын Тэргүүлэгчдийн нарийн бичгийн дарга бөгөөд Ажлын албаны дарга Н.Мөнхбаатар, ИТХ-ын Төлөөлөгч, Тэргүүлэгч, 3 дугаар хорооны Засаг дарга Б.Соёл-Эрдэнэ, Нийгмийн салбарын төслүүдийн удирагч, дүүргийн Засаг даргын орлогч Д.Ундармаа, ИТХ-ын Ажлын албаны Зохион байгуулалтын хэлтсийн дарга Э.Нансалмаа, 4 дүгээр хорооны Засаг дарга М.Энхманлай, 5 дугаар хорооны Засаг дарга Э.Батбаяр 6 дугаар хорооны Засаг дарга С.Очир, дүүргийн Газрын албаны ахлах мэргэжилтэн Г.Батзориг нар оролцлоо.

УИХ-ын гишүүн Х.Нямбаатар уг төслийг 2014 онд дүүргийн Иргэдийн Төлөөлөгчдийн Хурлын даргаар ажиллаж байхдаа санаачлан эхлүүлж байсан бөгөөд газар дээрээ олон жил амьдарч байгаа боловч газрын гэрчилгээгээ авч чадаагүй иргэдийн асуудлыг шийдвэрлэх, хашаандаа 3 ба түүнээс олон айл амьдардаг, өрх тусгаарласан боловч өөрийн гэсэн газаргүй залуучуудыг дэмжин шинэ газар олгох, иргэний бичиг баримтын зөрчилтэй иргэдийн бичиг баримтын зөрчлийг арилгах зэрэг иргэдийн өмнө тулгамдсан асуудлуудыг шийдвэрлэх зорилгоор эхлүүлж байсан юм.

Төсөл хэрэгжиж эхэлсэнээс хойш нийт 2500 гаруй иргэний газрын асуудлыг шийдвэрлэж, 250 гаруй иргэний бичиг баримтын зөрчлийг дүүргийн Иргэний бүртгэлийн хэлтэстэй хамтран шийдвэрлэсэн байдаг юм.

Тэгвэл төсөлд хандан өргөдөл гаргасан ч асуудлаа шийдвэрлүүлж чадаагүй байсан 360 хүний материалыг 2018 онд дахин бүрдүүлж газрын албанд уламжлан ийнхүү эхний ээлжийн 143 хүний гэрчилгээг өнөөдөр гардуулсан юм. Үлдсэн 200 орчим хүний газрын гэрчилгээг 2019 оны 2 дугаар улиралд батгаан шийдвэрлэхээр ажиллаж байгаа юм.

         УИХ-ын гишүүн Ц.Гарамжав “Бүтээгч” сургалтын төвтэй хамтран тойргийнхоо залуучуудыг мэргэжил олгох сургалтад хамруулахаар болжээ. Тодруулбал 18-40 насны залуучуудыг төмөр замчин, хүнд машин механизм, илчит тэрэгний засварчин, өртөөний жижүүр, ачаа вагон хүлээлцэгч гэсэн мэргэжлүүдээр сургах аж.

            Бүртгүүлэхийг хүссэн иргэд энэ сарын 31-ний дотор хорооныхоо Засаг даргад анкет, бүрэн дунд боловсролын гэрчилгээ, 2 хувь цээж зураг, оршин суугаа газрын тодорхойлолт зэргийг бүрдүүлж өгөх юм байна.

Дүүргийн нутаг дэвсгэрт нийтийн хэв журмыг сахиулах, гэмт хэрэг, зөрчлөөс урьдчилан сэргийлэх, уг ажилд иргэд, аж ахуй нэгж байгууллагуудыг татан оролцуулах, тэдний идэвхи санаачилгад суурилсан хяналтыг бий болгон, аюулгүй орчныг бүрдүүлэх зорилгоор "Явган эргүүлийн баг" сэдэвт аяныг хоёр дахь удаагаа зохион байгууллаа.

"Явган эргүүлийн баг" аяны хугацаанд дүүргийн нутаг дэвсгэрт өмчлөх эрх, хүний эрүүл мэндийн халдашгүй байдлын эсрэг гэмт хэргийн гаралт тодорхой хувиар буурсан үзүүлэлттэй байна. Тухайлбал, Цагдаагийн 1 дүгээр хэлтэст харъяалагдах нутаг дэвсгэрт бүртгэгдсэн өмчлөх эрхийн эсрэг гэмт хэрэг 21,9 хувиар, Цагдаагийн 2 дугаар хэлтэст харъяалагдах хороодын нутаг дэвсгэрт 9,0 хувиар, 3 дугаар хэлтэст харъяалагдах нутаг дэвсгэрт 25,4 хувиар, дүүргийн хэмжээнд 18.7 хувиар буурсан үзүүлэлттэй байна.

Тэгвэл өнөөдөр дүүргийн 32 хорооны Гэмт хэргээс урьдчилан сэргийлэх ажлыг зохицуулах зөвлөлийн дунд зохион байгуулсан "Явган эргүүлийн баг" хоёр дахь удаагийн аян дүнгээ гаргаж, шагнал гаруулах ажиллагааг зохион байгууллаа.

Аяны тусгай байрт 4 дүгээр хорооны Гэмт хэргээс урьдчилан сэргийлэх ажлыг зохицуулах дэд зөвлөл шалгарсан бол 3 дугаар байрт 8 дугаар хороо, 2 дугаар байрт 22 дугаар хороо, тэргүүн байрт 3 дугаар хорооны Гэмт хэргээс урьдчилан сэргийлэх ажлыг зохицуулах дэд зөвлөл тус тус шалгарч шагналаа гардан авлаа. Мөн аяны хугацаанд идэвхитэй сайн ажилласан 10 дугаар хорооны Иргэний танхимын ажилтан Б.Нэргүй, 21 дүгээр хорооны Иргэний танхимын ажилтан Б.Отгон-Эрдэнэ нарыг дүүргийн Иргэдийн Төлөөлөгчдийн Хурлын “Хүндэт өргөмжлөл”-өөр тус тус шагнасан бол цагдаагийн 7 албан хаагчийг ИТХ-ын “Хүндэт тэмдэг”-ээр тус тус шагналаа.

 Мөн арга хэмжээний үеэр дүүргийн Гэмт хэргээс урьдчилан сэргийлэх ажлыг зохицуулах зөвлөлөөс хууль сахиулах байгууллагуудын хүсэлтийг үндэслэн албан хэрэгцээнд зориулан 50 гаруй сая төгрөгийн дуран, энгэрийн камер, гар радио станц, компьютер, мотоцикл, ухаалаг дэлгэц зэрэг техник тоног төхөөрөмжийг хүлээлгэн өглөө. Мөн цагдаагийн албан хаагчдын идэвхи зүтгэлийг дэмжиж, тэдний нийгмийн асуудлыг шийдвэрлэх зорилгоор нэр бүхий 8 алба хаагчид иж бүрэн гэр өглөө.

Дэлхийн болон Монголын хүүхдийн шилдэг зохиол, бүтээлийг хүүхэд багачуудад таниулах, сурталчлах уран уншлагын урлагийг хөгжүүлэх зорилгоор Сонгинохайрхан дүүргийн цэцэрлэг, сургуулийн хүүхэд багачуудын дунд Засаг даргын тамгын газар болон Гэр бүл, Хүүхэд залуучуудын хөгжлийн хэлтэс, Нийслэлийн 65-р сургуулийн захиргаатай хамтран “Уран жиргээ-2019” уран уншлагын наадмыг 2019 оны 03 сарын 15-ны өдөр зохион байгуулсан. Уралдаанд 23 цэцэрлэг, 20 сургуулийн нийт 160 хүүхэд багачууд оролцож, СӨБ-ийн нас, сургуулийн бага, дунд, ахлах насны ангилалаар явагдсан.

Уралдааны ерөнхий шүүгчээр Монголын зохиолчдын эвлэлийн яруу найрагч Г.Ишхүү, шүүгчээр Монголын зохиолчдын эвлэлийн гишүүн МСТА Я.Отгонбаяр мөн Сайн охин ТББ-ийн тэргүүн С.Сарантуяа нар ажилаллаа.

Уралдаанд:

- цэцэрлэгийн насны ангилалд:

• Тэргүүн байранд Сонгинохайрхан дүүргийн 110-р цэцэрлэгийн 5 настай Б.Чинхүслэн

• Дэд байранд Сонгинохайрхан дүүргийн 128-р цэцэрдэгийн 5 настай М.Дарига

• Гутгаар байранд Сонгинохайрхан дүүргийн 78-р цэцэрлэгийн 5 настай Б.Мөнхцацрал

• Тусгай байранд Сонгинохайрхан дүүргийн 158-р цэцэрлэгийн 5 настай Д.Дэлгэрцэцэг

- Сургуулийн бага насны ангилалд:

• Тэргүүн байранд Нийслэлийн 65 сургуулийн 5е ангийн сурагч Б.Билгүүн

• Дэд байранд Нийслэлийн “Ирээдүй” цогцолбор 3-р бага сургуулийн 5б ангийн сурагч Б.Нарангоо

• Гутгаар байранд Нийлэлийн “Ирээдүй” цогцолбор 2-р бага сургуулийн 1б ангийн сурагч Э.Бүжинлхам

• Тусгай байранд Нийслэлийн 105 сургуулийн 5б ангийн сурагч Н.Бадамгарав

- Сургуулийн дунд насны ангилалд:

• Тэргүүн байранд Нийслэлийн 65 сургуулийн 9б ангийн сурагч Э.Бат-Энх

• Дэд байранд Нийслэлийн “Ирээдүй” цогцолбор I-р ахлах сургуулийн 6б ангийн сурагч Б.Эрдэнэтунгалаг

• Гутгаар байранд Нийлэлийн “Ирээдүй” цогцолбор 2-р дунд сургуулийн 7и ангийн сурагч Л.Жамбалсүрэн

• Тусгай байранд Нийслэлийн 9-р сургуулийн 6 ангийн сурагч Ч.Ариунзаяа

- Сургуулийн ахлах насны ангилалд:

• Тэргүүн байранд Нийслэлийн 76 сургуулийн 10а ангийн сурагч Г.Намуунцэцэг

• Дэд байранд Нийслэлийн “Ирээдүй” цогцолбор II-р ахлах сургуулийн 10е ангийн сурагч Б.Оюун-Эрдэнэ

• Гутгаар байранд Нийлэлийн “Ирээдүй” цогцолбор II-р ахлах сургуулийн 11е ангийн сурагч Ш.Өлзийхуяг

• Тусгай байранд Нийслэлийн 67-р сургуулийн 11б ангийн сурагч М.Энхжин нар тус тус шалгарлаа.

Наадамд эхний 3 байр эзэлсэн хүүхэд, багачууд Нийслэлийн хэмжээнд зохион байгуулагдах уралдаанд дүүргийн нэрийн өмнөөс насны ангилал тус бүрт оролцох эрхтэй болж, өргөмжлөл,эрхийн бичгээ гардан авлаа.

Сонгинохайрхан дүүргийн Жижиг, дунд үйлдвэрлэлийг дэмжих газрын дарга О.Гэрэлт-Одын ярилцлагыг хүргэж байна.

 

-Та Цагаан сарын өмнө сошиал болон хэвлэл мэдээллийн хэрэгслээр үндэсний, жижиг дунд үйлдвэрлэгчдийнхээ бүтээгдэхүүнийг худалдан авч Эх оронч худалдаа хийхийг уриалсан. Ямар үр дүн гарав? Тухайлбал, танай дүүргийн жижиг, дунд үйлдвэрлэгчдийн бүтээгдэхүүнийг худалдаалдаг дэлгүүр хэр орлоготой байв?

-Ер нь Монголчууд нэг үеэ бодвол үндэсний үйлдвэрлэлээ дэмждэг, эх оронч худалдан авалт хийдэг болжээ. Зөвхөн манай дэлгүүр гэлтгүй ер нь л хүмүүс үндэсний бүтээгдэхүүний худалдан авах хандлагатай болж байна. Миний найз нөхөд хамаатнууд, эргэн тойрныхон бүгд л эх орныхоо үйлдвэрлэлийн бүтээгдэхүүнийг худалдан авч цагаан сарын бэлэг болгож байсан шүү. Наад зах нь Эрээний гэгдэх бүтээгдэхүүний авч, гарын бэлэг болгохоо больсон байна. Өмнө нь дотоодын бүтээгдэхүүний үнэ өндөр, чанар муу байна гэсэн шүүмжлэл байсан бол худалдан авалт нэмэгдэхийн хэрээр үйлдвэрлэгчид маань үнэ, чанартаа анхаарч байна, өрсөлдөөн нэмэгдэхийн хэрээр ур чадвараа сайжруулж, үнээ бууруулж байна. Засгийн газраас ч анхаарч энэ жилийг Үндэсний худалдан авалтыг дэмжих жил болгосон. Одоо бид цаашдаа илүү их хичээж, бүтээгдэхүүн, ур чадвараа улам сайжруулах, хамтарсан байдлаар үйл ажиллагаага нэгтгэн явуулах гэх мэт хийх ажил их байна. Цагаан сарын хувьд хаа, хаанаа хичээж ажилласны үр бүтээл өндөр сайхан байлаа.

https://news.mn/r/2103207/?fbclid=IwAR1RQOKQEsGxphn5DgQnvVlripap9X9D-ZRbJHeJf41tdpwocH6Cr2nbji8

 

Сонгинохайрхан дүүргийн иргэдийн 70 орчим хувь нь гэр хороололд амьдардаг гэсэн тоон мэдээлэл бий.

Гэр хороололд амьдарч буй иргэдийн хувьд гэр, байшингаа хангалттай хэмжээнд дулаалж чаддаггүйгээс дулаан алдагдал ихээр үүсч, түүнийг дагасан галлагаа нэмэгддэг. Энэ нь утааг илүү их хэмжээгээр үйлдвэрлэж байна гэсэн үг юм.

Тиймээс Сонгинохайрхан дүүргийн удирдлагууд Улаанбаатар хотын гэр хороололд дулааны алдагдал багатай байшин барихад дэмжлэг үзүүлж, зөвлөгөө өгөх, санхүүгийн зуучлалын үйлчилгээ үзүүлэх төсөл”-ийг  хэрэгжүүлэгч байгууллагуудыг төлөөлж ЖЭРЭС олон улсын төрийн бус байгууллагын Монгол дахь төлөөлөгчийн газрын дарга Веатриз Марото Изкүэрдотой хамтарч ажиллах санамж бичиг байгууллаа.

Ингэснээр тус ТББ-ынхан Сонгинохайрхан дүүргийн 7, 8, 9, 10, 11, 28, 31 гэсэн 7 хорооны 1000 орчим айл өрхийн дунд судалгаа хийн, тэдэнд гэр, байшингаа зөв дулаалах, дулаан алдагдлыг хэрхэн бууруулах талаар сургалт хийж, заавар зөвлөгөө өгөх юм.   

Засаг дарга Ж.Сандагсүрэн өнөөдөр Нийслэлийн удирдах ажилтны шуурхай зөвлөгөөнд цаг үеийн асуудлаар мэдээлэл хийлээ. Энэ онд Сонгинохайрхан дүүрэгт Улс, нийслэл, орон нутгийн төсвийн хөрөнгө оруулалтаар 123 тэрбум төгрөгийн ажил үйлчилгээ хийгдэхээр төлөвлөгдсөн. Мөн энэ онд 61 төсөл арга хэмжээ эрх шилжин хэрэгжих бөгөөд 22 цэцэрлэг, 11 сургуулийн барилга, өртгөтгөл ашиглалтад орно гэдгийг Засаг дарга Ж.Сандагсүрэн мэдээллийнхээ эхэнд онцолсон юм.

Эдгээр сургууль ашиглалтад орсноор сургуулийн хүчин чадал 8920 хүүхдээр нэмэгдэж, дүүргийн хэмжээнд 12 дугаар сургуулиас бусад сургууль 2 ээлжээр хичээллэх боломжоор хангагдах юм.

         Түүнчлэн Сонгинохайрхан дүүрэг төсвийн орлогын хүрээнд 2018 онд улсын төсөвт 28.7 тэрбум төгрөг төвлөрүүлэхээс 39.7 тэрбум төгрөг төвлөрүүлж төлөвлөгөөг 138.3 хувь, нийслэлийн төсөвт 36.1 тэрбум төгрөг төвлөрүүлэхээс 36.0 тэрбум төгрөг төвлөрүүлж төлөвлөгөөг 99,7 хувь, орон нутгийн төсөвт 9.5 тэрбум төгрөг төвлөрүүлэхээс 14.4 тэрбум төгрөг төвлөрүүлж төлөвлөгөөг 151.6 хувь, нийт 74.3 тэрбум төгрөг төвлөрүүлэхээс 90.1 тэрбум төгрөг төвлөрүүлж, төлөвлөгөөг 121.3 хувиар биелүүлжээ.  

Сонгинохайрхан дүүргийн Засаг дарга Ж.Сандагсүрэн мэдээллийнхээ төгсгөлд “Дүүргийн эдийн засаг, нийгмийн үндсийг бэхжүүлж, төрийн үйлчилгээний чанар хүртээмжийг нэмэгдүүлэх, засаг захиргаа нутаг дэвсгэрийн нэгжийн тогтвортой хөгжлийн орчныг бүрдүүлэх зорилгоор 10.000-аас дээш хүн амтай хороог хувааж, хилийн цэст өөрчлөлт оруулах замаар шинээр 9 хороо байгуулах тооцоо, судалгааг гаргасан. Ингэснээр Сонгинохайрхан дүүрэг 41 хороотой болох юм” гээд уг асуудлыг шийдэж өгөхийн хотын даргаас хүслээ.