Засаг дарга Ж.Сандагсүрэн гэрээ байгуулах ёслолын ажиллагааны нээлтэнд хэлсэн үгэндээ:
“2017 он та бидний хувьд бүрэн эрхийн хугацааны гарааны нэн хариуцлагатай жил. Тийм ч учраас би Засаг даргын анхны 01 тоот албан даалгавраа дүүргийн эдийн засаг, нийгмийг 2017 онд хөгжүүлэх үндсэн чиглэлийн хэрэгжилтийг зохион байгуулах тухай гаргаж та бүхэнд хүргүүлсэн. Энэхүү чиглэлээс өөрийн байгууллага, хэлтэс, албадын дүрмээр хүлээсэн чиг үүрэгтэй холбоотой заалтуудыг үр дүнгийн гэрээндээ тусгасан байх гэж найдаж байна. Үр дүнгийн гэрээгээр хүлээсэн үүргээ нэр төртэйгөөр биелүүлэн, ажлын хариуцлага, сахилга бат, төрийн албаны ёс зүйг чанд сахиж, иргэдэд үзүүлэх төрийн үйлчилгээндээ ахиц дэвшил гарган, дуугарвал дуу нэг, дугтарвал хүч нэг гэсэн ардын сайхан сургаалийг эрхэмлэн эв нэгдэлтэй, хамтран ажиллахыг хүсье.” гэлээ.