XVII жарны “Алтан унжлагат” хэмээгч гал тахиа жилийн сар шинийн баярыг тохиолдуулан иргэд аж ахуйн нэгжүүд үйлдвэрийн болон жижиглэнгийн үнээр худалдаа хийх боломжийг нээлээ.
УИХ-н гишүүн Д.Сумъяабазар санаачилж, Сонгинохайрхан дүүргийн Хүнс, худалдаа үйлчилгээний хэлтэс, Хөдөлмөр, халамж үйлчилгээний хэлтэс, Жижиг дунд үйлдвэрийг дэмжих төв хамтран “Цагаан сар Сонгинохайрхан-2017” үзэсгэлэн худалдааг зохион байгуулж байна. Үзэсгэлэн худалдааны нээлтэд НИТХ-ийн төлөөлөгч Б.Цолмон, Сонгинохайрхан дүүргийн Засаг дарга Ж.Сандагсүрэн, УИХ-ын гишүүн Д.Сумъяабазарын зөвлөх Ж.Цэдэнрагчаа нар оролцлоо. Үзэсгэлэн худалдаа нь дүүргийн хэмжээнд жижиг дунд үйлдвэрлэл, өрхийн бичил бизнес эрхлэгч иргэн, аж ахуйн нэгж байгууллагуудын үйлдвэрлэсэн бараа бүтээгдэхүүний борлуулалтыг дэмжих, сурталчлах, худалдааны түншлэл тогтоох, дүүргийн иргэдэд сар шинийн баярт зориулан бараа, бүтээгдэхүүнийг нэг дороос өргөн сонголттойгоор, хямд үнээр худалдан авах боломжийг бүрдүүлж буйгаараа онцлог юм. Үзэсгэлэн худалдаа 02-р сарын 17-ноос 19-ны өдрүүдэд та бидний нэрлэж заншсанаар 32 буюу 1-р хорооллын 32 дугаар байрны дэргэдэх талбайд болж байгаа юм. Энэ худалдаанд “Талх чихэр”, “Хаан хүнс”, “Сүү” зэрэг дүүргийн хэмжээнд үйл ажиллагаа явуулдаг үндэсний томоохон аж ахуйн нэгжүүдээс гадна 68 иргэн, аж ахуйн нэгж оролцож байна.