4 дүгээр хорооны Гэмт хэргээс урьдчилан сэргийлэх ажлыг зохицуулах дэд зөвлөлийн хамт олон “Амар тайван хороо” сарын аян эхлүүллээ. 4 дүгээр сарын 12-ноос 5 дугаар сарын 12 хүртэл нэг сарын хугацаанд үргэлжлэх уг аяны хүрээнд шинээр хэрэгжиж буй хууль болон хэлэлцүүлгийн шатанд яваа хуулийн төслүүдийг иргэдэд таниулах үйл ажиллагааг зохион байгуулах юм.
Аяны хүрээнд аж ахуйн нэгж байгууллагуудад гэрэлтүүлэг болон камерын ач холбогдлын талаар зөвлөгөө өгөх, иргэд олон нийтэд хуулиудын талаар мэдээ мэдээлэл өгч, сургалт сурталчилгаа хийх зэрэг ажлуудыг төлөвлөжээ. “Амар тайван хороо” аяны нээлтэд тус хорооны Засаг дарга М.Энхманлай, 226 дугаар цэцэрлэгийн эрхлэгч Ж.Алтанчимэг, Хэсгийн байцаагч О.Нямдорж, “Наран манал” өрхийн эрүүл мэндийн төвийн дарга Г.Баярсайхан болон бусад холбогдох хүмүүс оролцлоо.