2016 онд Гэмтэл Согог Судлалын Үндэсний Төвөөр үйлчлүүлсэн иргэдийн 24,4% нь буюу Сонгинохайрхан дүүргийн 18,070 иргэн байна. Үүнээс 1012 нь түлэнхийн шалтгаанаар үйлчлүүлсэн гэсэн судалгаа гарсан. Хамгийн их түлэгдэлттэй 7, 26, 1, 2, 22-р хороонууд түлэгдэлт ихтэй өвчлөл өндөр байна. Мөн энгийн үед өдөрт 8-10 иргэн түлэгдэлтийн тусламж үйлчилгээ авч байсан бол цагаан сарын өдрүүдэд өдөрт 28-60 хүн тусламж үйлчилгээ авчээ. Нийт түлэгдэлтийн дийлэнх хувийг 0-5 насны хүүхэд багачууд эзэлж байна.
“Хүүхдийн түлэгдэлт–Эцэг эхийн хариуцлагаас” аяны хүрээнд Сонгинохайрхан дүүргийн Засаг даргын тамгын газар, Сонгинохайрхан дүүргийн Эрүүл мэндийн төв, Гэмтэл согог судлалын үндэсний төв хамтран түлэгдэлт хамгийн өндөр байгаа 7-р хороог сонгон авч бага насны хүүхэдтэй, халуун тогоо хэрэглэдэг 10-н өрхөд туршилтын хугацаанд халуун тогооны тогтоогч байршуулж байна. Уг тогтоогчийг байршуулсан айл өрхөөс хэсэг хугацааны дараа хэрэглэж байгаа саналыг нь сонсож нөхцөлийг сайжруулахаар төлөвлөж байгаа юм.