1.    Сонгинохайрхан дүүргийн Худалдан авах ажиллагааны алба нь Сонгинохайрхан дүүргийн Мэргэжлийн хяналтын хэлтсийн байрлаж байгаа ажлын байрны өрөөний засвар, коридор, интернэт сүлжээний холболтын ажлыг хэрэгжүүлэх зорилгоор зөвлөх үйлчилгээний гэрээ байгуулах гэж байгаа тул зөвлөхийн үйлчилгээ үзүүлэх хүсэлтэй этгээдийг мэдүүлгээ ирүүлэхийг урьж байна.

2.    Энэхүү зөвлөх үйлчилгээ нь Сонгинохайрхан дүүргийн Мэргэжлийн хяналтын хэлтсийн

1.    Ажлын байрны 10  өрөө, коридорын засвар

2.    Интернэт сүлжээний  холболтын ажлын төсвийг тус тус хийх болно.

3.    Мэдүүлгээ ирүүлж буй зөвлөх хуулийн этгээд нь “Төрийн болон орон нутгийн өмчийн хөрөнгөөр бараа, ажил, үйлчилгээг худалдан авах тухай” хуулийн 14-16 дугаар зүйлд заасан шалгуур үзүүлэлт, шаардлагуудыг хангаж буйг нотлох баримт бичгийн баталгаажуулсан хуулбар хувийг  болон  дараах  баримтуудыг  хавсарган  

ирүүлнэ.

1.    Байгууллагын ерөнхий танилцуулга, байгууллагын гэрчилгээний хуулбар

2.    Сүүлийн 3 жилд гүйцэтгэсэн  ижил  төстэй  ажлын  талаарх  мэдээлэл, тодорхойлолт

4.    Мэдүүлгээ ирүүлж буй зөвлөх нь уг үйлчилгээг гүйцэтгэх чадвартайг нотлох мэдээллийг / нийтлэл, ижил төрлийн ажлын туршлага, ажиллах боловсон хүчний чадвар, туршлагын талаарх мэдээлэл гэх мэт / ирүүлнэ. Чадварыг нэмэгдүүлж сайжруулах зорилгоор зөвлөхүүд түншлэлийн хэлбэрээр оролцож болно.

5.    Сонирхсон этгээд нэмэлт мэдээллийг 2013 оны 05 сарын 31-ний  8⁰⁰-17⁰⁰  хооронд авч болох бөгөөд мэдүүлгээ дор дурдсан хаягаар 2013 оны 06 сарын 07-ны 17⁰⁰  цагаас өмнө ирүүлнэ үү.

Хаяг: Улаанбаатар хот, Сонгинохайрхан Дүүргийн Засаг Даргын Тамгын газар 101 тоот

Холбоо барих: 70000717

Худалдан Авах Ажиллагааны Алба

Сонгинохайрхан дүүргийн Засаг дарга М.Чинболд дүүргийн 12, 13, 14, 15 дугаар хорооны нутаг дэвсгэр буюу Саппорогийн тойргоос Хархорин худалдааны зах хүртэлх төв зам дагуух аж ахуйн нэгж, байгууллагуудын хаягжилт, зам талбайн тохижилтын байдалтай танилцлаа. Энэ үед тус дүүргийн хэлтэс албадын дарга нар хамт байлцаж, тохижилттой холбоотой цаашид авч хэрэгжүүлэх үүрэг даалгаврыг тэдэнд өгөв. Тухайлбал, аж ахуйн нэгж байгууллагуудын хаягжилтыг нэгдсэн стандарттай болгох, ойр орчмын цэвэрлэгээ, гаднах тохижилтыг тогтмол хийж үйлчилгээний газруудын өнгө үзэмжийг сайжруулж, ногоон байгууламжийг арчлах, гар дээрээс ил задгай худалдаа эрхлэхийг таслан зогсоох зэрэг үүрэг даалгавар өгсөн байна. 

Сонгинохайрхан дүүргийн хэмжээнд үйл ажиллагаа явуулдаг боловсролын байгууллагын төлөөлөл болсон 1000 гаруй багш нарын дунд “Боловсролын шинэчлэлд хамтдаа” сэдэвт уулзалтыг дүүргийн Нийгмийн хөгжлийн хэлтэс, Боловсролын хэлтэстэй хамтран зохион байгуулжээ. МҮЭСТОрдонд 5 дугаар сарын 16-ны өдөр зохион байгуулагдсан уулзалтад

БШУ-ны сайд Л.Гантөмөр, БШУЯамны Стратеги бодлого төлөвлөлтийн хэлтсийн дарга Насанбаяр, дүүргийн Засаг дарга М.Чинболд, Боловсролын хэлтсийн дарга А.Одонтунгалагтуул нар оролцсон.

Уулзалтын үеэр ерөнхий боловсролын сургууль, цэцэрлэгүүд хүүхэд нэг бүрийг хөгжүүлэх зорилгоор “Авьяас”, “Ном” хөтөлбөрийн хүрээнд хийгдсэн ажлынхаа тайлан үзэсгэлэнг дэлгэсэн байна. 

“Хууль зүйн үндэсний хүрээлэн”-гээс иргэдэд эрх зүйн мэдээ, мэдээллээр үйлчлэх, хууль зүйн мэдлэгийг дээшлүүлэх, үнэ төлбөргүй зөвлөгөө өгөхөд чиглэсэн “Иргэдийн эрх зүйн боловсролыг дээшлүүлэх” сэдэвт сурталчилгааны ажлыг 2013 оны 5 дугаар сард зохион байгуулж байгаа юм. 

Энэхүү ажлын хүрээнд Нийслэлийн бүх дүүрэгт “Эрх зүйн сурталчилгааны хөдөлгөөнт цэг”-ийг тухайлсан өдрүүдэд ажиллуулана.

Сонгинохайрхан дүүргийн хувьд 5 дугаар сарын 17-ны өдрийн Баасан гаригт “Эрх зүйн сурталчилгааны хөдөлгөөнт цэг” ажиллах бөгөөд иргэдэд хууль, эрх зүйн мэдээлэл, зөвлөгөө өгөх юм.

Иргэд та бүхнийг энэ сурталчилгааны өдөрлөгт идэвхитэй хамрагдаж эрх зүйн мэдээлэл, үнэгүй зөвлөгөө авахыг хүсье.

СОНГИНОХАЙРХАН ДҮҮРГИЙН ЗАСАГ ДАРГЫН ТАМГЫН ГАЗАР

Сонгинохайрхан дүүргийн Засаг даргын 2013 оны 17 дугаар захирамжийн хүрээнд Оюутны спортын Универсиад-III наадмыг  3 дугаар сарын 2-ныөдрөөс 5 дугаар сарын 4-ний өдрүүдэд сагсан бөмбөг, ширээний теннис, шатар, модон бөмбөг, волейбол гэсэн 5 төрлөөр явагдаж, тус дүүргийн нутаг дэвсгэрт үйл ажиллагаа явуулдаг 5 дээд сургуулийн 289 оюутан тамирчин тамирчин оролжээ.  Хоёр сарын турш үргэлжилсэн тус тэмцээний дүн байгууллагын нэгдсэн дүнгээр тэргүүн байранд Ч.Амарбат дасгалжуулагчтай “Чингис Соосэ” дээд сургуулийн баг, хоёрдугаар байранд Б.Минжбадгар дасгалжуулагчтай “Мандах бүртгэл” дээд сургуулийн баг, гуравдугаар байрт “Монос” дээд сургуулийн баг тамирчид шалгарч, цом, өргөмжлөл алт, мөнгө, хүрэл медаль, мөнгөн шагналын эздээр тодорлоо. 

Сонгинохайрхан дүүргийн Онцгой байдлын хэлтэст 5 дугаар сарын 12-ны 22:00 цагаас 5 дугаар сарын 13-ны 04:50 цаг хүртэлх хугацаанд аюулт үзэгдэл, техникийн холбогдолтой ослын 2 дуудлага иржээ.  Энэ үеэр тус дүүргийн 20 дугаар хорооны нутаг дэвсгэр Хүй долоон худаг Галзуу барын ам гэдэг газарт 3 иргэн малтайгаа цасан шуурганд төөрч, хоорондоо холбоо барьж чадахгүй байсныг Онцгой байдлын хошууч А.Батбаяраар ахлуулсан 3 хүнтэй бүрэлдэхүүн гарч эрэн хайх, аврах ажиллагааг зохион байгуулж иргэн Б.Нямдорж, Ш.Оюунбилэг, Ш.Нямсүрэн, Д.Бямбацогт нарыг олж, осгох аюулаас амь насыг нь авран хамгаалж гэрт нь хүргэж өгсөн байна.

 Мөн цасан шуурганд төөрсөн, хүчтэй салхи шуурганд гэр, байшин, хашаа нурсан дуудлага 12 иржээ. Эдгээр дуудлаганд Онцгой байдлын хэлтсийн 4 албан хаагч, Аврах гал унтраах 26 дугаар ангиас 7 албан хаагч, Аврах гал унтраах 29 дүгээр ангиас 5 албан хаагч нийт 16 албан хаагч 4 автомашинтайгаар үүрэг гүйцэтгэв.

Бүх нийтээр мод тарих үндэсний өдөр, Ногоон хот аяны хүрээнд Сонгинохайрхан дүүргийн Засаг даргын тамгын газар “Бүх нийтээр мод тарьцгаая” уриан дор тэмдэглэн энэ өдөр 4000 гаруй мод тарилаа. Тус дүүргийн Дэд бүтэц, тохижилтын хэлтсээс зохион байгуулсан өдөрлөгт УИХ дахь Ардчилсан намын бүлгийн дарга Д.Эрдэнэбат, Сонгинохайрхан дүүргийн Засаг даргын орлогч Н.Ганаа, Ц.Төрхүү нар оролцож ногоон хот байгуулахад дүүргийн иргэн бүр идэвхтэй оролцохыг уриалсан юм.

Сонгинохайрхан дүүргийн Залуус, Барилгачин гудамж, 13, 15, 16 дугаар хорооны нутаг дэвсгэрт Засаг даргын тамгын газрын алба хаагчид мод тарилаа. Мөн Ирээдүй цогцолбор сургуулийн төгсөх ангийн сурагчид, тус дүүргийн 28 дугаар хорооны албан хаагчид өөрсдийн санаачилгаар 2000 гаруй мод тарьжээ.  ЭНэ өдөр тарьсан моддыг цаашид “СБМ” ХХК хариуцан арчлан хамгаалах юм.

Мод тарих үндэсний өдрийн хүрээнд тус дүүргийн бүх хороо, цэцэрлэг сургууль өөрийн байрны орчин тойронд мод тарьсан байна.

БНСУ-ын Байгаль орчны сан, Монголын “Хөгжил дэх оролцооны төлөө холбоо-Жи Си Эс” ТББ хамтран Солонгосын “Лотте” группын дэмжлэгтэйгээр Сонгинохайрхан дүүргийн цахилгаан эрчим хүчинд холбогдоогүй өрхүүдэд нарны үүсгүүрт гэрэл олгох “Хүжийн гал” төслийг хэрэгжүүлж байгаа.

Тус төслийн хүрээнд 135ш нарны үүсгүүрт гэрлийг Сонгинохайрхан дүүргийн амьжиргааны түвшин доогуур, цахилгаан эрчим хүчгүй, сургуулийн насны олон хүүхэдтэй айлуудад олгох бөгөөд эхний хэсгийг 5 дугаар сарын 12-ны Ням гаригт гардуулсан юм.

Тус үйл ажиллагаанд Согинохайрхан дүүргийн Засаг даргын Нийгмийн бодлогын асуудал хариуцсан орлогч Н.Ганаа, Эдийн засаг, санхүү, төлөвлөлтийн асуудал хариуцсан орлогч Р.Дагва, Захиргаа хуулийн хэлтсийн дарга Т.Зулбилэг тэргүүтэй албаны хүмүүс байлцсан бол Солонгосын талаас ноён Кан Ги Жон, Ким Юнь Дог нарын БНСУ-ын  парламентийн 5 гишүүн, Байгаль орчны сангийн ерөнхий нарийн бичгийн дарга И Ми Гён зэрэг хүмүүс хүрэлцэн ирж нарны зайн гэрлүүдээ иргэдэд гардууллаа.

Солонгосын Байгаль орчны сан, “Хөгжил дэх оролцооны төлөө холбоо-Жи Си Эс” ТББ  урьд нь Сонгинохайрхан дүүрэгт худаг гаргах “Амьдарлын эх булаг” төсөл, иргэдийг хөгжүүлэх төрөл бүрийн сургалтын болон өрхийн орлогыг нэмэгдүүлэх бичил зээлийн хөтөлбөрүүдийг хэрэгжүүлж байсан юм. Эдгээр төсөл хөтөлбөрүүдийг гардан хэрэгжүүлж байгаа “Жи Си Эс” ТББ-ын Монгол дах салбарын захирал Н.Батдорж болон хамт олонд нь Сонгинохайрхан дүүргийн иргэдийн өмнөөс талархал илэрхийлье.

Дүүргийн Засаг дарга М.Чинболд үйл ажиллагааны хөтөлбөртөө гадаад эх үүсвэртэй зээл тусламж, хөрөнгө оруулалтыг дэмжих талаар тусгасан. ЗДТГ-аас Олон улсын болон Төрийн бус байгууллагуудтай олон салбарт хамтарч ажиллаж байгаагийн нэг нь энэхүү үйл ажиллагаа боллоо.