СОНГИНОХАЙРХАН ДҮҮРЭГ
ЗАСАГ ДАРГЫН ТАМГЫН ГАЗАР
СОНГИНОХАЙРХАН ДҮҮРЭГ
ЗАСАГ ДАРГЫН ТАМГЫН ГАЗАР
НИТХ-ын төлөөлөгч Б.Цолмонгийн санаачлагаар үүсгэн байгуулсан “Цолмон” сангаас Сонгинохайрхан дүүргийн 8, 9, 25 дугаар хорооны 2500 орчим ахмадад хүрч үйлчлэх хүчин чадалтай уламжлалт эмчилгээний сувиллын байр өнөөдөр ашиглалтад орлоо.
Нээлтийн ажиллагаанд НИТХ-ын төлөөлөгч Б.Цолмон, Сонгинохайрхан дүүргийн Засаг даргын Нийгмийн бодлого хариуцсан орлогч Б.Ундармаа, Хөрөнгө оруулалт, төсөл хөтөлбөр хариуцсан орлогч Л.Оргил болон Сонгинохайрхан дүүргийн 8, 9, 25 дугаар хороонд амьдарч буй ахмадын төлөөлөл оролцлоо.
“Цолмон” сангийн дэргэдэх уг уламжлалт эмчилгээний сувилал нь ахмадуудад зориулсан олон төрлийн үйлчилгээ үзүүлэх бөгөөд ардын оношилгоо, хаш чулуун орны физик эмчилгээг үнэ төлбөргүй үзүүлэх юм.
Тус сангаас зөвхөн ахмадуудад төдийгүй дээрх хороодын хүүхэд багачууд руу чиглэсэн томоохон ажлуудыг хэрэгжүүлж байгааг НИТХ-ын төлөөлөгч Б.Цолмон яриандаа онцолсон.
Тухайлбал “Монголын Оюун ухааны академи”-тай хамтран улсын дөрвөн цэцэрлэг, гурван сургуульд хүүхдийн оюун ухаан хөгжүүлэх хөтөлбөрийг 2017 оноос хойш амжилттай хэрэгжүүлж байгаа юм. Цаашид өндөр настан болон хүүхэд багачууд руу чиглэсэн олон ажил хийхээр төлөвлөж байгааг тус сангийнхан онцоллоо.
Нийслэлийн Засаг даргын захирамжийн дагуу нийслэлийн цэргийн бүртгэлийн ажлыг энэ сарын 4-21-ний өдрүүдэд засаг захиргааны анхан шатны нэгж буюу хороодын байранд зохион байгуулж байна.
Нийслэлийн есөн дүүргийн Цэргийн штабын удирлагууд өнөөдөр цэргийн бүртгэлийн ажил эхний 10 хоногийн байдлаар хэрхэн явагдаж байгаа танилцуулав.
Өнөөдрийн байдлаар нийслэлийн хэмжээнд цэргийн бүртгэлийн явц 53 хувьтай байна.
Баянгол дүүрэг 46.2 хувь
Баянзүрх дүүрэг 53.3 хувь
Сонгинохайрхан дүүрэг 51.2 хувь
Чингэлтэй дүүрэг 61.1 хувь
Сүхбаатар дүүрэг 56.3 хувь
Хан-Уул дүүрэг 60.1 хувь
Налайх дүүрэг 54.1 хувь
Багануур дүүрэг 64 хувь
Багахангай дүүрэг 66.1 хувь
Бүртгэлийг ажлын өдрүүдэд 09:00-19:00 цагийн хооронд, амралтын өдрүүдэд 10:00-18:00 цагийн хооронд засаг захиргааны анхан шатны нэгж буюу хороодын байранд зохион байгуулж байна.
Цэргийн бүртгэлд 65 нас хүртэл Бэлтгэл офицерууд, 18-50 нас хүртэл цэргийн үүрэгтэн, 50 нас хүртэл цэрэгт бүртгэлтэй мэргэжил бүхий эмэгтэйчүүд хамрагдах юм байна.
НЗДТГ-ын Цэргийн штабын Батлан хамгаалах хууль тогтоомж, хяналт шинжилгээ хариуцсан офицер Т.Мөнхбаяр “Нийслэлийн хэмжээнд цэргийн бүртгэлийн ажил 53 хувийн явцтай байна. Энэ сарын 21-нийн өдөр хүртэл дахин долоо хоногийн хугацаа үлдэж байгаа тул иргэний үүргээ биелүүлж цэргийн бүртгэлдээ идэвхитэй хамрагдахыг нийслэлийн Цэргийн штабаас уриалж байна. Хэрэв цэргийн бүртгэлд бүртгүүлээгүй тохиолдолд Зөрчлийн тухай хуульд зааснаар 100 нэгжээр торгох заалттай. Мөн байгууллага, ААН-үүд иргэнийг цэргийн бүртгэлдээ бүртгүүлэхэд саад учруулсан нь тогтоогдвол 1 сая төгрөгөөр торгох заалттай” хэмээлээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
Дүүргийн Гэмт хэргээс урьдчилэн сэргийлэх ажлыг зохицуулах зөвлөл, Цагдаагийн 3 хэлтсүүд хамтран “Явган эргүүлийн баг” аяныг энэ оны 3 дугаар сарын 30-ныг дуустал 4 сарын хугацаанд зохион байгуулахаар боллоо.
Аяны хүрээнд 32 хорооны Гэмт хэргээс урьдчилан сэргийлэх ажлыг зохицуулах дэд зөвлөлүүдийн дунд болзолт уралдаан зарлаж, гэмт хэргийн гаралт буурсан, тодорхой үр дүнтэй, бодит ажил хийсэн хороод, ажилтан алба хаагчдыг шалгаруулан урамшуулах юм.
Сонгинохайрхан дүүргийн 3, 5, 10, 11, 28-р хороод “Түмэнд нээлттэй хязгаарынхан” ХХК-тай хамтран “Цэвэр агаар эрүүл мэнд” аян өрнүүлжээ. Тус компани нийгмийн хариуцлагынхаа хүрээнд сурагчдын амралтаар орон нутагт байгаа ар гэрийнхэндээ очих хүсэлтэй хүүхдүүдийг өөрсдийн санхүүжилтээр хүргэж өгч байгаа юм.
“Агаарын бохирдлоос хүүхдүүдээ хамгаалцгаая” уриатай энэ аяны хүрээнд дээрх хороодоос нийт 37 хүүхэд, 5 асран хамгаалагчийн хамт тус компанийн автобусаар Увс аймгийг зориод байна. Хүүхдүүд Увс аймагт тус тусын асран хамгаалагч дээрээ агаарт амарч байгаад энэ сарын 24-нд Улаанбаатар хотод буцаж ирэх юм.
Сонгинохайрхан дүүргийн 29-р хороо “Москва” хорооллын 133/3-р байрны гадна талын нурж унасан хэсгийг засварлажээ. Нийт 110 өрх айл амьдардаг уг байрны гадна талын тоосго нурж тухайн хэсэгт оршин суудаг айлуудын амьдрах нөхцөл хүндэрсэн.
Чанар муутай баригдсан уг орон сууцны эвдэрсэн хэсэгт 20 орчим айл хүнд нөхцөлд амьдарч байв. Харин хорооны удирдлагууд тус хорооноос НИТХ-д сонгогдсон төлөөлөгч М.Халиунбатад хүсэлт тавьж 8.8 сая төгрөгөөр засварласан байна.
Сонгинохайрхан дүүргийн Улаан загалмайн хорооны хамт олон угтан ирж буй шинэ жилийн баярыг тохиолдуулан “Santa challenge” аяныг амжилттай өрнүүллээ. Уг аяны хүрээнд өнөөдөр дүүргийн 32 хорооны зорилтот бүлгийн 310 хүүхдэд бэлэг гардууллаа.
Сонгинохайрхан дүүргийн 7-р хорооны нутаг дэвсгэрт байрлах Баянхошууны 29-р гудамж, 0119-р ангийн 4-р гудамж, Далангийн 1-р гудамжны нийт 48200м2 талбай усанд автаж, аюулд өртөөд байна.
Тус хэсэгт 45 айл оршин сууж байгаа бөгөөд бүгд усанд автаж, хашаа байшин, гэр, эд хогшлоо мөсөнд автуулаад байна. Үүнээс 20 өрх гэрт, байшинд 14 өрх байна. Хүн амын байдлаар авч үзвэл нийт 133 хүнээс 17 ахмад настан, 49 хүүхэд, бусад насны 67 иргэн байна.
Тэдгээр айлуудын хүсэлтийг харгалзан үзэж, Засаг даргын Тамгын газар, Онцгой байдлын хэлтэс хамтран 11 айлыг өөр байршилд нүүлгэн шилжүүлсэн бөгөөд 34 айл үлдсэн хэвээр байна.
Уул уурхай, хүнд үйлдвэрийн сайд Д.Сумъяабазарын нэрэмжит "Багшийн алдар"-2018 спорт наадам өнгөрсөн амралтын өдрүүдэд спортын 2 төрлөөр зохион байгуулагдлаа.
Тэмцээнд сагсан бөмбөгийн эрэгтэй төрөлд 20 сургуулийн 140 багш, волейболын эмэгтэй төрөлд 22 сургуулийн 176 багш нар хамрагдлаа.
Нээлтийн үйл ажиллагаанд Д.Сумъяабазарын зөвлөх Ж.Одбаяр, н.Чандман, СХД-ийн Засаг даргын орлогч Д.Ундармаа, Боловсролын хэлтсийн дарга А.Дүүдээ Биеийн тамир спорт хорооны дарга Ц.Ганхүү нар болон бусад төлөөлөгчид оролцлоо.
Сагсан бөмбөгийн төрөлд:
1-р байрт Ц.Даваадоо захиралтай 42-р сургууль
2-р байрт н.Туулсайхан захиралтай 12-р сургууль
3-р байрт Г.Чимгээ захиралтай 105-р сургууль
Волейболын төрөлд:
1-р байрт Г.Цагаанцоож захиралтай Ирээдүй цогцолбор сургууль
2-р байрт н.Туулсайхан захиралтай 12-р сургууль
3-р байрт Х.Баяржаргал захиралтай 76-р сургуулийн баг тамирчид тус тус шалгарч, эрэгтэй сагсан бөмбөгийн шилдэг тоглогчоор 12-р сургууийн багш Ж.Энхбаатар, волейболын эмэгтэй шилдэг тоглогчоор 76-р сургууийн багш Д.Мөнхнасан шалгарлаа.
Хүйтэн сэрүүний улирал эхэлж, утаа хэвийн хэмжээнээс хэдийнэ даваад буй билээ. Сонгинохайрханчууд Засаг дарга Ж.Сандагсүрэнгийн санаачлагаар 2016 онд “Энгийн дадлаар Эрүүл амьсгалцгаая” аяныг өрнүүлж, байж болох хамгийн энгийн аргаар өөрсдийгөө утаанаас хамгаалж суръя, амны хаалт хэрэглэж хэвшье гэдэг уриалгыг гаргасан билээ.
Тэгвэл 22-р хорооны Засаг дарга М.Тэмүгэ “CUMINS” ххк-тай хамтран хорооныхоо 244, 188-р цэцэрлэгийн багачуудад 1500 ширхэг утааны эсрэг амны хаалт бэлэглэжээ.
Жил бүр уламжлал болгон зохион байгуулдаг хамтарсан багийг чадваржуулах 2 сарын аян өчигдөр өндөрлөж, шилдгүүдийг шалгарууллаа. 2018 оны шилдгийн шилдэг хамтарсан багаар Г.Оюунчимэг даргатай 7-р хороо, "Толгойт бүс"-ийн шилдгээр Б.Соёл-Эрдэнэ даргатай 3-р хороо, "Төвийн бүс"-ийн шилдгээр З.Батдэлгэр даргатай 27-р хороо, "Баянхошуу бүс"-ийн шилдгээр Б.Хишигт даргатай 10-р хороо, "Өнөр бүс"-ийн шилдгээр Г.Бадамцэцэг даргатай 31-р хорооны хамтарсан багууд шалгарч өргөмжлөл, мөнгөн шагналын батламжаа гардаж авлаа.
Мөн дүүргийн Гэр бүл, хүүхэд, залуучуудын хөгжлийн хэлтсээс шилдэг албан хаагчдыг шалгаруулсан бөгөөд "Шилдэг Засаг дарга"-аар 26-р хорооны Засаг дарга Э.Ууганцэцэг, "Шилдэг нийгмийн ажилтан"-аар 19-р хорооны нийгмийн ажилтан С.Алдармаа, Шилдэг сургуулийн нийгмийн ажилтнаар 62-р сургуулийн нийгмийн ажилтан Саруултуяа, Шилдэг хэсгийн байцаагчаар 3-р хорооны байцаагч Г.Гантүвшин нар тус тус шалгарсан юм.
