2017 онд Сонгинохайрхан дүүрэгт улс, нийслэлийн төсвийн эх үүсвэрээр шинээр ерөнхий боловсролын сургууль-2, цэцэрлэг-2, конценссийн гэрээгээр 5 цэцэрлэг, 8 сургуулийн өргөтгөл, БНХАУ-ын буцалтгүй тусламжаар 4 сургуулийн барилгын ажлыг эхлүүлж, 2 сургуулийн өргөтгөл, 4 цэцэрлэгийн барилгыг ашиглалтанд оруулах юм.
2017-2020 онд сургууль, цэцэрлэгийн хүртээмжийг нэмэгдүүлж, “Жаргалтай үрс” төсөл хэрэгжүүлэн хороо бүрийг цэцэрлэгтэй болгон сургуулийн өмнөх боловсролд хамрагдалтын түвшинг 80 хувьд хүргэнэ. Төрийн өмчийн ашиглагдаагүй барилгын судалгааг нарийвчлан гаргаж холбогдох мэргэжлийн байгууллагын дүгнэлтийг үндэслэн засвар үйлчилгээ хийж цэцэрлэгийн зориулалтаар ашиглан сургуулийн өмнөх боловсролын байгууллагын хүчин чадлыг нэмэгдүүлэх юм. Хүүхдэд ээлтэй эрүүл, аюулгүй орчин бүрдүүлэх, үндэсний ухамсар, эх оронч сэтгэлгээтэй, амьдрах ухаан, бие даах чадвартай иргэн төлөвшүүлэх, багшийн ажиллах орчныг сайжруулж, чадварлаг боловсон хүчнийг нэмэгдүүлэх чиглэлээр анхаарч ажиллахыг хэллээ.